Haukur Páll Sigurðsson aðstoðarþjálfari Vals var ánægður með úrslit kvöldsins eftir að liðið hans sigraði Stjörnuna 5-1 á Hlíðarenda.
Lestu um leikinn: Valur 5 - 1 Stjarnan
„Það er ánægja, hrikalega ánægður með að taka 3 stig úr þessum leik. Skorum góð mörk, dreifðist svolítið markaskorunin sem er jákvætt líka. Bara hrikalega góð frammistaða."
Tryggvi Hrafn Haraldsson sóknarmaður liðsins skoraði í dag sín fyrstu mörk á tímabilinu. Það er mjög jákvætt fyrir liðið ef hann kemst í svipað form og hann var í, í fyrra.
„Gott fyrir sjálfstraustið hjá honum. Það er bara mjög ánægjulegt að hann hafi skorað sín fyrstu mörk í dag. Þannig það er bara mjög jákvætt."
Meiðsli hafa verið að hrjá hópinn hjá Val en Aron Jóhannsson, Jakob Franz Pálsson og Gylfi Þór Sigurðsson voru allir frá vegna meiðsla í dag.
„Aron er bara meiddur, búinn að vera meiddur aðeins í ökklanum og smá vöðvatognun hjá honum líka. Þannig við erum búnir að vera í smá meiðslavesenum líka þannig þá er bara spurning um að aðrir stigi upp og þeir gerðu það í dag. Þess vegna erum við með stóran og góðan hóp. Jakob sneri sér á ökkla fyrir tveimur dögum síðan. Þannig það er búið að vera smá bras á leikmannahópnum en eins og ég sagði þá er bara tímabært að aðrir stigi upp og það var mjög jákvætt að sjá það í dag."
Valur mætir KR næst en hverjar eru líkurnar á því að þessir leikmenn nái þeim leik?
„Ég bara veit ekki nákvæmlega stöðuna á þeim, hún er bara tekin dag frá degi. Mér finnst ólíklegt að Gylfi nái því, við erum að stefna á bara eftir landsleikjahlé að hann komi til baka. Hitt verður bara að koma í ljós."
Gregg Ryder þjálfari KR var í stúkunni að fylgjast með leiknum en Haukur telur ekki miklar líkur á því að þrátt fyrir góða spilamennsku Vals að Gregg hafi eitthvað hræðst.
„Nei ég held hann sé svo sem ekkert hræddur. Ég meina þetta er bara fótboltaleikur og ég held hann pæli bara meira í sínu liði heldur en okkar. Við allavega gerum það, við pælum töluvert meira í okkar leik en andstæðinganna. Þannig að nei nei, ég held að hann sé ekkert hræddur."
Viðtalið má sjá í heild sinni í spilaranum hér fyrir ofan.