Íslendingalið Venezia er komið alla leið í úrslitaleik umspilsins um síðasta lausa sætið í Serie A, efstu deild ítalska boltans, á næstu leiktíð.

Feneyingar mæta þar Cremonese og voru að spila fyrri viðureignina í kvöld, en henni lauk með markalausu jafntefli þrátt fyrir yfirburði heimamanna í Cremonese.

Bjarki Steinn Bjarkason lék allan leikinn á vinstri kanti Venezia og var meðal bestu leikmanna vallarins og þá fékk Mikael Egill Ellertsson að spreyta sig í síðari hálfleik.

Mikael fékk að spila síðasta stundarfjórðunginn í jafnteflinu markalausa, en seinni leikurinn fer fram í Feneyjum næsta sunnudag. Þar mætast Venezia og Cremonese í úrslitaleik um afar verðmætt sæti í Serie A.