KA 2 - 3 ÍA
1-0 Bjarni Aðalsteinsson ('14 )
1-1 Hinrik Harðarson ('16 )
1-2 Ingi Þór Sigurðsson ('22 )
2-2 Ívar Örn Árnason ('36 )
2-3 Arnór Smárason ('42 , víti)
Lestu um leikinn
1-0 Bjarni Aðalsteinsson ('14 )
1-1 Hinrik Harðarson ('16 )
1-2 Ingi Þór Sigurðsson ('22 )
2-2 Ívar Örn Árnason ('36 )
2-3 Arnór Smárason ('42 , víti)
Lestu um leikinn
ÍA kom sér upp í 5. sæti Bestu deildar karla með 3-2 sigri sínum á KA í 9. umferð deildarinnar á Greifavelli á Akureyri í dag.
Akureyringar hafa ekki byrjað tímabilið eins og þeir höfðu vonast eftir. Aðeins einn sigur úr átta leikjum á meðan nýliðar ÍA hafa gert ágætis hluti í endurkomu sinni í deildina.
KA-menn byrjuðu leikinn mjög vel. Sóknarleikurinn var öflugur fyrstu mínúturnar.
Það gekk vel að sækja upp hægri vænginn, spilið til fyrirmyndar, en vantaði úrslitasendinguna.
Heimamenn fengu gjöf á 14. mínútu leiksins er Skagamenn töpuðu boltanum klaufalega fyrir utan eigin vítateig. Rodrigo Gomes Mateo fékk boltann, setti hann á Svein Margeir Hauksson sem framlengdi út hægra megin á BJarna Aðalsteinsson sem skaut þéttingsföstu skoti á milli lappa Árna Marinós Einarssonar og í netið. Fyrsta skot KA á markið.
Forysta þeirra varði ekki lengi. Það kom langur bolti í átt að teignum. Engin hætta var í kringum Hrannar Björn Steingrímsson sem skallaði boltann fyrir eigið mark og á Hinrik Harðarson sem átti ekki í vandræðum með að afgreiða boltann í netið.
Nokkrum mínútum síðar komust Skagamenn í forystu. Jón Gísli Eyland Gíslason var með boltann á hægri vængnum, rann til, en var fljótur á lappir. Hann kom síðan boltanum fyrir á Steinar Þorsteinsson sem fann Inga Þór Sigurðsson rétt fyrir utan teiginn.
Ingi Þór smurði boltann efst upp í vinstra hornið. Glæsilegt mark hjá honum.
Á 29. mínútu vildu heimamenn fá vítaspyrnu er Jón Gísli sparkaði Birgi Baldvinsson niður í teignum. Þeir höfðu eitthvað til síns máls en í endursýningunni sást augljós snerting í atvikinu.
Átta mínútum síðar jöfnuðu KA-menn. Daníel Hafsteinsson með flotta hornspyrnu inn á miðjan teiginn og á Ívar Örn Árnason sem skallaði boltann í fjærhornið.
Þegar um fjórar mínútur voru eftir af venjulegum leiktíma í fyrri hálfleik fengu Skagamenn vítaspyrnu. Erik Tobias Sandberg var sparkaður niður í teignum og var Elías Ingi Árnason ekki lengi að benda á punktinn.
KA-menn eflaust vel sviknir enda var þetta keimlíkt atvikinu sem átti sér stað á hinum enda vallarins.
Arnór Smárason, fyrirliði Skagamanna, fór á punktinn og skoraði af öryggi í hægra hornið. Fleira markvert gerðist ekki í annars fjörugum fyrri hálfleik.
Byrjun síðari hálfleiks einkenndist af mikilli baráttu og liðin ekki að skapa sér neitt af viti. Leikur
KA-menn komust í hraða skyndisókn á 58. mínútu leiksins er Daníel keyrði fram. Hann reyndi að leika á Oliver Stefánsson og vildi fá dæmda hendi, en fékk ekki. Virtist vera með hendur upp við líkama í þessu tilviki.
Varamaðurinn Viðar Örn Kjartansson kom sér í frábært færi á 70. mínútu. Hann fékk boltann inn fyrir, en fyrsta snertingin var slæm og missti hann boltann til Árna í markinu.
Skagamenn fengu dauðafæri til að gera út um leikinn á 75. mínútu. Jón Gísli stal boltanum í miðjum teig KA, lagði hann fyrir Hinrik en skot hans yfir markið. Illa farið með gott færi.
Heimamenn reyndu að þrýsta Skagamönnum aftar á völlinn síðustu mínúturnar. Þegar fimm mínútur voru eftir af venjulegum leiktíma var KA nálægt því að gera jöfnunarmark, en á einhvern ótrúlegan hátt var boltanum skóflað af Skagamanni og yfir markið, en engin hornspyrna dæmd. Undarlegt allt saman.
Ármann Ingi Finnbogason fékk gullið tækifæri í næstu sókn þegar hann fékk boltann í miðjum teignum, en stýrði boltanum yfir markið.
Færin voru á báða bóga síðustu mínúturnar. Næst átti Hallgrímur Mar Steingrímsson gæðasendingu frá hægri vængnum og inn á Daníel sem var kominn í frábært færi, en náði ekki að halda boltanum niðri og flaug boltinn því yfir markið.
KA átti nokkrar tilraunir í uppbótartímanum en náðu ekki að skila boltanum í netið.
Lokatölur 3-2 fyrir ÍA sem fer upp í 5. sæti deildarinnar með 13 stig en KA, sem var að tapa sjötta deildarleik sínum, er í næst neðsta sæti með 5 stig.
Besta-deild karla
Lið | L | U | J | T | Mörk | mun | Stig |
---|---|---|---|---|---|---|---|
1. Víkingur R. | 12 | 8 | 3 | 1 | 28 - 13 | +15 | 27 |
2. Valur | 12 | 7 | 4 | 1 | 30 - 15 | +15 | 25 |
3. Breiðablik | 11 | 8 | 1 | 2 | 26 - 13 | +13 | 25 |
4. ÍA | 10 | 5 | 1 | 4 | 20 - 14 | +6 | 16 |
5. Stjarnan | 12 | 5 | 1 | 6 | 24 - 24 | 0 | 16 |
6. FH | 10 | 4 | 2 | 4 | 18 - 20 | -2 | 14 |
7. Fram | 10 | 3 | 4 | 3 | 13 - 14 | -1 | 13 |
8. HK | 11 | 4 | 1 | 6 | 14 - 21 | -7 | 13 |
9. KR | 11 | 3 | 3 | 5 | 20 - 22 | -2 | 12 |
10. Vestri | 11 | 3 | 1 | 7 | 14 - 28 | -14 | 10 |
11. Fylkir | 10 | 2 | 1 | 7 | 15 - 27 | -12 | 7 |
12. KA | 10 | 1 | 2 | 7 | 14 - 25 | -11 | 5 |
Athugasemdir