Ítalski þjálfarinn Maurizio Sarri er með samningstilboð á borðinu frá gríska félaginu Panathinaikos. Þetta segir ítalski íþróttafréttamaðurinn Gianluca Di Marzio.
Sarri sagði upp störfum hjá Lazio í mars eftir að lið hans tapaði fjórða leik sínum í röð.
Claudio Lotito, forseti Lazio, vildi ekki taka það í mál að Sarri myndi hætta en samþykkti á endanum uppsögn landa síns.
Áður þjálfaði Sarri Juventus, Chelsea, Napoli og Empoli, en hann er óvænt orðaður við þjálfarastarf gríska félagsins Panathinaikos.
Di Marzio fullyrðir að Sarri sé með samningstilboð á borðinu frá félaginu, en liggur nú undir feld. Panathinaikos er einnig að skoða Vincenzo Italiano, þjálfara Fiorentina og Walter Mazzarri, fyrrum þjálfari Inter og Napoli. Greinilega stórhuga þarna í Grikklandi, en hvort þetta sé raunhæfur möguleiki er annað mál.
Íslenski landsliðsmaðurinn Hörður Björgvin Magnússon er á mála hjá Panathinaikos.
Sarri hefur einnig verið orðaður við Leicester City, sem vann ensku B-deildina á nýafstaðinni leiktíð.
Athugasemdir