Vestri vann afskaplega öflugan og verðskuldaðan 4-2 sigur gegn Stjörnunni í Bestu deild karla í dag. Davíð Smári Lamude þjálfari Vestra var í leikbanni í leiknum og fylgdist með úr stúkunni.
Lestu um leikinn: Vestri 4 - 2 Stjarnan
„Hrikalega sterkur sigur og það gekk allt upp sem við ætluðum okkur í þessum leik. Ég er ánægður með upplegg leiksins og með leikmenn að hafa skilað þessu,“ segir Davíð.
„Við sýndum allt sem á að einkenna Vestraliðið og það var afskaplega gaman að sjá það. Við þorðum að spila boltanum.“
Davíð var á flakki um stúkuna meðan á leik stóð. Hvernig var að fylgjast með þaðan?
„Það er gríðarlega erfitt en gerir það aðeins auðveldara að það gekk vel. Ég á erfitt með að horfa á fótboltaleiki án þess að tjá mig og ég var talandi við sjálfan mig einhvers staðar úti í horni," segir Davíð.
Það er mikið um meiðsli í leikmannahópi Vestra.
„Það er gríðarlega mikið hnjask á hópnum og nánast enginn á bekknum í dag sem er alveg heill."
Athugasemdir