„Það er súrt að tapa og sérstaklega gegn Breiðablik og sérstaklega á heimavelli og maður er því mjög svekktur" Segir Ómar Ingi Guðmundsson þjálfari HK eftir 2-0 tap gegn Breiðabliki.
Lestu um leikinn: HK 0 - 2 Breiðablik
„Það vantaði upp á að dómararnir sinni sínu starfi. Ég er ekki að segja að við hefðum unnið leikinn en mér fannst ósanngjarnt hvernig við lendum undir."
Fyrsta mark Breiðabliks var einmitt mjög umdeild en þá var boltinn á ferð þegar aukaspyrna var tekinn í aðdragandanum.
„Það sáu það allir hélt ég að boltinn var á ferð. Það var augljóst. Ívar var mjög nálægt þessu. Þetta er óskiljanlegt, þetta er alltof nálægt þeim og alltof augljóst. Höskuldur er nýbúinn að kasta boltanum frá sér þannig að auðvitað er hann á hreyfingu. Þetta er bara lélegt. Þetta var lélegasta ákvörðun og stærstu mistök leiksins"
„Þetta breytti leiknum. Við þurftum að koma hærra á völlinn. Þeir gátu beðið eftir að við gerum mistök sem og við gerðum í öðru markinu. Við þurftum að breyta til vegna ákvörðun sem átti ekki rétt á sér."
Eiður Gauti Sæbjörnsson virtist meiðast ansi alvarlega á upphafssekúndum leiksins.
„Hann fær högg á andlitið og fékk skurð á andlitið. Ég veit ekki nákvæmlega hvað gerðist. Ég þarf bara að bíða eftir því að fá frekari fréttir á eftir."
Landsleikjafrí er framundan og því langt í næsta leik.
„Við þurfum að hvíla okkur og jafna okkur á þessum leik. Við munum æfa vel og fínstilla nokkur atriði. Það eru nokkur atriði sem við þurfum að ná betri tökum á."
