Vestri vann afskaplega öflugan og verðskuldaðan sigur gegn Stjörnunni í Bestu deild karla í dag. Elmar Atli Garðarsson fyrirliði Vestra var hæstánægður eftir leik.
Lestu um leikinn: Vestri 4 - 2 Stjarnan
„Mér finnst við hafa reynt það nokkuð lengi að ná upp svona frammistöðu. Auðvitað þarf allt að ganga upp hjá okkur til að vinna lið eins og Stjörnuna og það gerði það í dag," segir Elmar.
Elmar segir að honum hafi fundist þreyta í Stjörnumönnum sem voru að spila á fimmtudaginn gegn Val þar sem þeir töpuðu illa.
Hann vonast til þess að þetta hafi verið síðasti heimaleikurinn sem Vestri þarf að spila í Laugardalnum. Liðið ætti að geta spilað á Ísafirði gegn Val þann 22. júní.
Það er mikið um hnjask og meiðsli hjá Vestra og þetta landsleikjahlé sem kemur núna er því kærkomið fyrir Djúpmenn. Næsti leikur er gegn Fylki þann 18. júní.
„Við höfum ekki verið heppnir með meiðsli en það er kærkomið frí núna og við getum vonandi endurheimt leikmenn þegar við komum til baka úr því. Þetta kemur á góðum tíma fyrir okkur."
