Ítalski varnarmaðurinn Giorgio Scalvini fer ekki með ítalska landsliðinu á Evrópumótið í Þýskalandi eftir að hafa slitið krossband í lokaleik Seríu A í gær.
Scalvini, sem er 20 ára gamall, hefur verið gríðarlega mikilvægur í vörn Atalanta síðasta árið. Hann fagnaði mikilli velgengni með ítalska liðinu, sem komst í bæði úrslit ítalska bikarsins og Evrópudeildarinnar.
Liðið tapaði fyrir Juventus í bikarnum en vann síðan Evrópudeildina þökk sé þrennu Ademola Lookman.
Atalanta mætti Fiorentina í lokaleik 38. umferðar Seríu A í gær, en leiknum var frestað þar sem bæði lið komust í úrslit í Evrópukeppni.
Undir lok leiksins meiddist Scalvini illa á hné og kom í ljós nokkrum tímum síðar að hann sleit krossband og er EM-draumurinn því endanlega úti.
Luciano Spalletti, þjálfari ítalska landsliðsins, valdi Scalvini í hópinn fyrir Evrópumótið, en er nú búinn að kalla Federico Gatti varnarmann Juventus inn í hans stað.
Athugasemdir