KSÍ greinir frá aukningu á áhorfendafjölda á leikjum í fyrri hluta Bestu deildar karla frá því í fyrra.
Í fyrrasumar mættu að meðaltali 843 manns á hvern leik í fyrri hluta Bestu deildarinnar, en í ár hækkaði talan um tæplega 30 manns á leik - eða upp í 871 manns á leik að meðaltali.
Alls sóttu 114.935 manns leikina 132 sem fóru fram í sumar.
Flestir áhorfendur horfðu á heimaleiki Breiðabliks og KR en mesta aðsóknin kom á stórleik Breiðabliks gegn Víkingi R. á Kópavogsvelli. Þar mættu 2215 manns til að horfa á 1-1 jafntefli í toppbaráttunni.
Það mættu 2170 manns á heimaleik KR gegn Víkingi R. fyrir rúmri viku síðan, sem Víkingar unnu 0-3. Þá mættu 2107 áhorfendur á Meistaravelli til að horfa á Breiðablik leggja KR að velli 3-2 í lok apríl, sem er einum áhorfanda minna (2108) heldur en mætti á heimaleik Víkings R. gegn Breiðabliki viku fyrr - þar sem Víkingur vann frábæran 4-1 sigur.
Athugasemdir
