Spá Fótbolta.net fyrir Bestu deildina: 12. sæti

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. ÍBV, 14 stig

Um liðið: ÍBV er komið aftur í deild þeirra bestu eftir stutt stopp í næst efstu deild. ÍBV er gamalt stórveldi í íslenskum fótbolta en það hefur í raun verið lítið jákvætt að frétta í fótboltanum í Vestmannaeyjum síðustu ár. Meiri fókus hefur verið á handboltanum. En núna er karlaliðið í fótboltanum komið aftur upp í Bestu deildina og það hlýtur að vera stefnan að festa sig aftur þar í sessi, byggja upp gott lið og stemningu í kringum það. Stemninguna vantaði síðast þegar ÍBV var með lið í efstu deild og hana þarf að byggja aftur upp svo Vestmannaeyingar geti leyft sér að dreyma aftur um þann árangur sem einkenndi Eyjaliðið í kringum aldamót.

Þjálfarinn: Þorlákur Árnason tók við ÍBV eftir síðasta tímabil. Hermann Hreiðarsson kom ÍBV upp en hann lét af störum út af persónulegum ástæðum og tók svo við HK. Þorlákur, betur þekktur sem Láki, er 55 ára gamall og hefur starfað víða um heim síðustu ár. Hann starfaði síðast sem aðalþjálfari Damaiense í portúgalska kvennaboltanum en þar áður þjálfaði hann Þór í Lengjudeildinni. Fyrir það starfaði Láki meðal annars sem yfirmaður akademíu Brommapojkarna í Svíþjóð og yfirmaður fótboltamála hjá fótboltasambandinu í Hong Kong.

Styrkleikar: Það er mikill styrkleiki fyrir ÍBV að halda í Oliver Heiðarsson sem var besti leikmaður Lengjudeildarinnar í fyrra. Það komu nokkur tilboð í hann en ÍBV sýndi styrk og náði að halda honum, allavega í bili. ÍBV skoraði mikið í Lengjudeildinni í fyrra og það verður fróðlegt að sjá hvernig Oliver og Omar Sowe munu vinna saman í sóknarleiknum. Sowe kemur sér í mikið af færum og það er bara spurning hvernig hann nýtir þau. Heimavöllurinn er ÍBV mikilvægur og það er ekki auðvelt að spila á Hásteinsvelli, sérstaklega ekki eftir erfiða bátsferð.

Veikleikar: Það hafa orðið miklar breytingar hjá ÍBV í vetur. Leikmannaveltan er mikil og stórir póstar á borð við Guðjón Erni Hrafnkelsson, Tómas Bent Magnússon og Vicente Valor hafa horfið á braut. Guðjón Ernir og Tómas Bent voru búnir að vera lengi hjá félaginu og vissu hvað það þýddi að spila fyrir ÍBV. Hermann Hreiðarsson var búinn að smíða upp ákveðinn leikstíl og núna koma breytingar með Láka, sem taka kannski tíma. Heyrst hefur að erlendu leikmennirnir hafi ekki verið að heilla, en þeir þurfa að sanna sig fljótt í Bestu deildinni. Fyrirfram virðist leikmannahópurinn ekki mikið sterkari en í fyrra, ef eitthvað.

Lykilmenn: Oliver Heiðarsson og Sigurður Arnar Magnússon
Oliver var besti leikmaður Lengjudeildarinnar í fyrra og þurftu Eyjamenn að leggja mikið á sig til að halda honum. Hann hefur gæði og kraft til að gera frábæra hluti í Bestu deildinni. Sigurður Arnar er Eyjamaður í húð og hár sem hefur mikla reynslu úr Bestu deildinni. Hann er kominn heim eftir að hafa leikið afar vel í háskólaboltanum í Bandaríkjunum.

Gaman að fylgjast með: Viggó Valgeirsson
Átján ára gamall miðjumaður sem lék stórt hlutverk í Lengjudeildinni í fyrra en þar spilaði hann í 18 leikjum er ÍBV komst upp. Var valinn til æfinga hjá U19 landsliðinu í byrjun árs og fær vonandi gott hlutverk í Eyjaliðinu í sumar.

Spurningamerkin: Hvernig verður stemningin í kringum liðið? Hvernig munu allar breytingarnar ganga? Hversu mikið skorar Omar Sowe fyrir liðið?

Völlurinn: Hásteinsvöllur er líklega fallegasta vallarstæði landsins. Það gerist á hverju ári að fjallað er um hann í erlendum fjölmiðlum þar sem fegurðin umlykur hann. Eyjamenn eru að leggja gervigras sem kemur til með að vera mikið happaskref fyrir fótboltann í Vestmannaeyjum.

Komnir:
Omar Sowe frá Leikni
Jörgen Pettersen frá Þrótti R.
Arnór Ingi Kristinsson frá Leikni
Jovan Mitrovic frá Serbíu
Mattias Edeland frá Svíþjóð
Milan Tomic frá Serbíu
Birgir Ómar Hlynsson frá Þór á láni
Þorlákur Breki Baxter frá Stjörnunni á láni
Halldór Páll Geirsson frá KFS

Farnir:
Tómas Bent Magnússon í Val
Vicente Valor í KR
Guðjón Ernir Hrafnkelsson í KA
Arnór Sölvi Harðarson í ÍR
Henrik B. Máni Hilmarsson í Stjörnuna (var á láni)
Eiður Atli Rúnarsson í HK (var á láni)
Jón Ingason
Jón Arnar Barðdal í KFG

Samningslausir:
Eyþór Orri Ómarsson (2003)

Leikmannalisti:
1. Jón Kristinn Elíasson (m)
12. Hjörvar Daði Arnarsson (m)
Halldór Páll Geirsson (m)
2. Sigurður Arnar Magnússon
3. Birgir Ómar Hlynsson
4. Jovan Mitrovic
5. Felix Örn Friðriksson
6. Milan Tomic
9. Sigurður Páll Hjaltested
11. Víðir Þorvarðarson
14. Arnar Breki Gunnarsson
17. Sigurður Valur Sigursveinsson
18. Bjarki Björn Gunnarsson
20. Arnór Ingi Kristinsson
23. Omar Sowe
24. Þorlákur Breki Þ. Baxter
25. Alex Freyr Hilmarsson
28. Heiðmar Þór Magnússon
31. Viggó Valgeirsson
45. Oliver Heiðarsson
Jörgen Pettersen
Mattias Edeland
Nökkvi Már Nökkvason
Hermann Þór Ragnarsson

Fyrstu fimm leikir ÍBV:
7. apríl, Víkingur R. - ÍBV (Víkingsvöllur)
13. apríl, Afturelding - ÍBV (Malbikstöðin að Varmá)
24. apríl, ÍBV - Fram (Hásteinsvöllur)
28. apríl, Stjarnan - ÍBV (Samsungvöllurinn)
4. maí, ÍBV - Vestri (Hásteinsvöllur)

Spámennirnir: Anton Freyr Jónsson, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Kári Snorrason, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke, Sölvi Haraldsson, Tómas Þór Þórðarson og Valur Gunnarsson.