Sóknarmaðurinn Cristiano Ronaldo verður áfram hjá Al-Nassr á næstu leiktíð en þetta staðfesti Guido Fienga, framkvæmdastjóri félagsins, eftir tap liðsins gegn Al-Hilal í bikarúrslitum í gær.
Ronaldo, sem er 39 ára gamall, átti magnað tímabil en hann endaði markahæstur og bætti markametið með 35 mörk.
Hann skoraði í heildina 44 mörk í öllum keppnum með Al-Nassr og alls 50 mörk ef landsleikir eru teknir með inn í myndina.
Samningur Ronaldo gildir út næstu leiktíð og mun hann vera áfram hjá félaginu.
Guido Fienga, framkvæmdastjóri Al-Nassr, sagði að það myndi ekki breytast og þýðir það að hann verður á 41 aldursári þegar næstu leiktíð lýkur.
Ronaldo fer með Portúgal á Evrópumótið í Þýskalandi í sumar en að hann verði áfram með Al-Nassr gæti þýtt að hann ætli að reyna í síðasta sinn við HM-bikarinn.
HM fer fram í Bandaríkjunum, Kanada og Mexíkó árið 2026.
Athugasemdir
