Nökkvi Þeyr: Pabbi fær oft að heyra að synir hans séu í KA

„Mér fannst ég hafa átt skilið í fyrra að spila fleiri mínútur en það er auðvitað af því ég vil spila alla leiki"
Krefjandi tími og nýtt tungumál
Við fórum á reynslu um haustið 2015 til Hannover, það var í gegnum frænda okkar sem býr þarna úti og við stóðum okkur það vel að félagið vildi semja við okkur og í janúar 2016 vorum við fluttir út," sagði Nökkvi við Fótbolta.net.

Hvernig voru þessi rúmu tvö ár hjá þýska félaginu?

„Þetta var krefjandi tími, því það er svo gríðarlega mikil samkeppni þarna úti og maður þurfti að berjast í hverjum einasta leik fyrir sætinu sínu í byrjunarliði og líka út af tungumálinu, það er ekki töluð mikil enska þarna þannig við þurftum að læra tungumálið."

„Mér gekk rosalega vel og kom mér eiginlega strax í byrjunarliðið þegar við fengum leikheimild um haustið 2016 og spilaði eiginlega alla leiki eftir það. Þá vorum við á yngra ári í U19. Tímabilið eftir það var ég svo orðinn lykilmaður í liðinu og byrjaði flest alla leiki."

„Ég stóð mig mjög vel í byrjun tímabils og þeir voru mjög ánægðir með mig en svo seinni hluta tímabils dróg úr frammistöðunni minni og ég stóð mig ekki jafn vel og sýndi ekki nógu mikið fannst þeim til að fá nýjan samning. Ég bað þá um að fara en mátti það ekki þar sem ég var ennþá lykilmaður hjá þeim og því hélt félagið mér til lok maí, þá leitaði ég til Íslands."

Það útskýrir af hverju Nökkvi missti af byrjun tímabilsins 2018 hér á Íslandi en voru fleiri félög en uppeldisfélagið sem komu til greina?

„Ég hafði hugsað mér að taka sumarfrí frá fótboltanum því ég var orðinn mjög þreyttur líkamlega og gleðin var eiginlega alveg farin"
„Það var lítill áhugi hjá liðum hér heima fyrir utan Dalvík. Ég hafði hugsað mér að taka sumarfrí frá fótboltanum því ég var orðinn mjög þreyttur líkamlega og gleðin var eiginlega alveg farin. En ég ákvað bara að taka sumarfríið mitt og spila með uppeldisfélaginu mínu Dalvík, hafa gaman af því að spila fótbolta og finna gleðina aftur. Það gerði ég þetta sumar með Dalvík. Það komu alveg einhver önnur lið til greina úti í Þýskalandi en ekkert sem ég hafði einhvern almennilegan áhuga á."

Hæfileikarnir sáust á Laugarvatni
Færum okkur aftur til fortíðar því árið 2013 æfðu tvíburarnir með FC Kaupmannahöfn í Danmörku. Hverng kom það til?

„Ég var scoutaður af FCK á Laugarvatni og umboðsmaður hafði samband við pabba um að félagið hefði áhuga á að fá mig og Þorra á reynslu í viku. Það var bara reynsla og síðan ekkert meira."

Gaman að skora gegn Gomes og Chong
Í janúar árið 2018 má finna frétt með fyrirsögninni 'Nökkvi skoraði gegn Manchester United'. Nökkvi segir í Hinni hliðinni að hans lið í enska boltanum sé einmitt Manchester United. Hvernig var að skora gegn liðinu og fékk Nökkvi einhverja athygli vegna marksins?

„Það var mjög gaman að setja hann þarna á móti Angel Gomes og Tahith Chong. En ég fékk enga sérstaka athygli eftir þetta mark, ekki svo ég viti."

Ætlaði að hjálpa sínu liði að vinna titilinn
Við erum aftur komin heim á Klakann og norður á Dalvík. Tímabilið 2018 með Dalvík/Reyni, hvernig lítur Nökkvi til baka á það tímabil?

„Þetta var geðveikt tímabil. Ég kom heim og ákvað að hafa gaman og spila með vinum mínum og nota þetta sumarfrí bara í það og ætlaði að hjálpa Dalvík í leiðinni að komast upp og vinna titilinn sem við gerðum."

Fór í viðræður við Vålerenga
Nökkvi æfði hjá norska félaginu Vålerenga og FH eftir tímabilið. Þá er einnig sagt frá því að Valur hefði haft áhuga. Var hann nálægt því að semja við eitt af þessum liðum?

„Mér gekk mjög vel úti hjá Vålerenga, það vel að þeir vildu fá mig aftur til að skoða mig nánar. Það áttu sér einhverjar viðræður stað þar eftir reynsluna en það endaði með því að ég fór ekki en virkilega góð og skemmtileg reynsla. Ég og Þorri fórum um haustið 2018 til FH á reynslu í viku sem var mjög gaman og það er ótrúleg aðstaðan og umgjörðin þar. En þeir ákváðu að taka ekki sénsinn á okkur. Valur sagðist svo vera fylgjast með okkur en það fór nú ekki lengra en það."

Oft skotið á pabba Nökkva
Nökkvi skrifar undir hjá KA í febrúar 2019. Foreldrar hans hafa báðir tengingu við hitt liðið á Akureyri, Þór, og Nökkvi hafði æft með Þórsurum í yngri flokkunum. Var einhver pressa að velja ekki KA?

„Ég er Dalvíkingur fyrst og fremst en þegar kom að þessari ákvörðun var ég bara að hugsa um sjálfan mig og hvað væri besta skrefið fyrir mig og mér fannst það vera KA. Það var engin pressa frá hvorki pabba eða bræðrum hans þótt þeir djóki nú oft með þetta og pabbi fær oft að heyra það að synir hans séu í KA."

Átti skilið fleiri mínútur
Hvernig lítur Nökkvi til baka á síðasta tímabil? Sér hann eitthvað í sínum leik sem hann þyrfti að bæta?

„Þetta var bara ágætis tímabil og ég var sáttur með mína frammistöðu í þeim leikjum sem ég kom inn á í."

„Mér fannst ég hafa átt skilið í fyrra að spila fleiri mínútur en það er auðvitað af því ég vil spila alla leiki. Það er margt sem ég get bætt sem leikmaður og Óli [Stefán Flóventsson] þjálfari er að hjálpa mér að vinna í þeim punktum. Ef ég ætti að nefna eitthvað eitt þá væri það að ég þarf að bæta mig í loftinu finnst mér."

Vill komast í efstu deild á Norðurlöndunum
Hver eru markmið Nökkva fyrir leiktíðina sem er að hefjst?

„Markmið mín fyrir þessa leiktíð eru klárlega að hjálpa KA að ná Evrópusætinu og leggja mitt að mörkum þar. Ég vil spila sem flesta leiki og skora fleiri mörk."

Hvað segir Nökkvi ef hann er beðinn um að horfa tvö til þrjú ár fram í tímann. Er hann með markmið um að leika erlendis?

Já ég er með það markmið að komast á Norðurlöndin í einhverja af efstu deildunum þar í Danmörku, Svíþjóð eða Noregi. En fyrst og fremst er öll mín einbeiting núna á þetta tímabil með KA og að gefa allt sem ég á í það verkefni, hitt kemur svo."

Að lokum: Hvernig lýsir Nökkvi sér sem leikmanni?

„Mjög snöggur, tæknilega góður, líkamlega sterkur, góður einn á einn og get skorað mörk," sagði Nökkvi.

Sjá einnig:
Í fótspor föður og frænda
Hin hliðin - Nökkvi Þeyr Þórisson (KA)