Umboðsmaður Roque og leikmaðurinn sjálfur gerðu mikið veður yfir spiltíma hans á síðustu leiktíð.

Brasilíumaðurinn kom til Barcelona um áramótin. Hann lék alls sextán leiki og skoraði tvö mörk, en byrjaði þó aðeins tvo leiki.

Leikmaðurinn kvartaði mikið yfir því að hann fengi ekki að spila nóg og tók umboðsmaður hans undir það. Var jafnvel talað um að koma honum frá félaginu í sumarglugganum.

Sport sagði á dögunum að Barcelona væri tilbúið að selja hann fyrir 40 milljónir evra en Roque neitar að fara.

Hann hafnaði veglegu samningstilboði Al-Hilal fyrir nokkrum dögum og er staðráðinn í að sanna sig hjá Börsungum, þó félagið sé að reyna að fá þá Dani Olmo og Nico Williams.