Enski þjálfarinn Steve Bruce er í viðræðum við fótboltasamband Jamaíku um að taka við karlalandsliðinu en þetta kemur fram í Daily Mail í dag.
Bruce hefur ekkert komið að þjálfun síðustu tvö árin eða eftir að hann var látinn fara frá WBA.
Þjálfaraferill hans spannar tæp 30 ár og hefur hann stýrt liðum á borð við Aston Villa, Birmingham City, Hull City, Sunderland og Wigan.
Hann gæti nú verið að snúa aftur í þjálfun en samkvæmt heimildum Daily Mail er hann að ræða við fótboltasamband Jamaíku.
Ákvörðun mun liggja fyrir á næstu tíu dögum og er Bruce sagður líklegasti kosturinn í starfið.
Heimir Hallgrímsson hætti með Jamaíku í síðasta mánuði eftir tvö ár í starfi. Eyjamaðurinn var sagður óánægður með margt hjá sambandinu og sagði því upp störfum. Heimir tók við írska landsliðinu nokkrum dögum síðar.
Athugasemdir