Bellingham er aðeins 18 ára gamall og hefur vakið áhuga liða úr ensku úrvalsdeildinni sem hafa sett sig í viðræður við Sunderland.

Jobe Bellingham er yngri bróðir Jude Bellingham, stórstjörnu enska landsliðsins og Real Madrid, og gæti spilað sinn fyrsta úrvalsdeildarleik á undan stóra bróður sínum.

Crystal Palace er talið leiða kapphlaupið þar sem félagið er í viðræðum við Sunderland um kaupverð á Bellingham, sem kom að 8 mörkum í 47 leikjum á nýliðinni leiktíð.

Oliver Glasner, þjálfari Palace, hefur miklar mætur á Bellingham og er Dougie Freedman, yfirmaður fótboltamála, að vinna hörðum höndum að því að sannfæra leikmanninn um að færa sig um set.

Brentford og fleiri félög eru einnig sögð vera áhugasöm, en talið er að Bellingham eigi þrjú ár eftir af samningi sínum við Sunderland.