FCK hafnaði í 3. sæti dönsku deildarinnar í ár og fór því í umspil við Randers, sem hafnaði í efsta sæti fallriðilsins um sæti í Sambandsdeildina.

Randers fékk óskabyrjun er Wessel Dammers skoraði eftir einungis fimm mínútna leik en Orri jafnaði metin átta mínútum síðar. Það var fimmtánda mark hans á tímabilinu.

Mohamed Elyounoussi gerði sigurmark FCK þegar tólf mínútur voru liðnar af síðari hálfleiknum og þar við sat.

FCK mun því fara í forkeppni Sambandsdeildar Evrópu í sumar.

Rúnar Alex Rúnarsson sat allan tímann á varamannabekk FCK í leiknum.