Túfa kvaddi Greifavöll með sigri í dag
KA fékk Grindavík í heimsókn í dag á Greifavöllinn í næst síðustu umferð Pepsí-deildar karla og unnu 4-3 sigur. Srdjan Tufegdzig þjálfari KA manna var mjög sáttur með að vinna síðasta heimaleik sinn sem þjálfari KA.
Lestu um leikinn: KA 4 - 3 Grindavík
„Ég sagði við strákana fyrir leikinn í dag að eina sem kæmi til greina í dag væri sigur í síðasta heimaleik mínum og það gerðist. Leikur þar sem maður fékk allt, fullt af mörkum og fullt af færum. Það var reyndar líka uppleggið mitt að halda hreinu, það vita allir að ég elska hreint lak en svona eru oft síðustu leikir tímabilsins."
KA er svo gott sem öruggt í sjötta sæti deildarinnar þar sem Grindavík er þremur stigum og 11 mörkum frá þeim í 7.sætinu. Túfa er ánægður með sumarið en sagði að það hefði verið draumur hans að ná Evrópusæti.
„Markmið okkar var að gera betur en í fyrra og enda í efri helming deildarinnar, en minn draumur persónulega var að ná Evrópusæti þar sem það er eina sem ég hef ekki gert hjá KA, spila í Evrópu. Það gerðist ýmislegt, við lentum í meiðslum og það gekk ekki upp en ég er mjög sáttur með 6.sætið."
Túfa er að hætta með KA-liðið eftir tímabilið en vildi ekki tjá sig um framtíðina fyrr en að leiktíð lokinni.
„Ég tala bara við þig eftir tímabilið, það er mikið í gangi hjá öllum liðum. Bæði ég og KA viljum klára þetta með stæl og þetta kemur svo í ljós eftir tímabilið."
Athugasemdir
