Bjarki Steinn Bjarkason og Mikael Egill Ellertsson eru komnir í úrslitarimmu um sæti í Seríu A en þetta varð ljóst eftir 2-1 sigur Venezia á Palermo í kvöld.
Mikael Egill kom inn af bekknum hjá Venezia í sigrinum í kvöld en Bjarki var allan tímann á bekknum.
Venezia vann fyrri leikinn 1-0 og hefði jafntefli því dugað til að komast áfram.
Liðið ætlaði að gera gott betur en það og þegar flautað var til loka fyrri hálfleiks var staðan 2-0 Venezia í vil. Palermo náði að klóra í bakkann undir lok leiks er Venezia gerði sjálfsmark en lengra komst liðið ekki.
Venezia mun því mæta Cremonese eða Catanzaro í tveggja leikja rimmu um sæti í Seríu A en spilað er 30. maí og 2. júní.
Athugasemdir