Spá þjálfara og fyrirliða fyrir Lengjudeildina: 7. sæti

Spáin:
1. ?
2. ?
3. ?
4. ?
5. ?
6. ?
7. ÍR, 112 stig
8. Grindavík, 101 stig
9. Leiknir R., 100 stig
10. Fjölnir, 82 stig
11. Selfoss, 49 stig
12. Völsungur, 24 stig

7. ÍR
Það bjuggust nú flestir við því að ÍR myndi falla beint aftur niður í 2. deild þegar síðasta tímabil fór af stað. Þó ef horft var í undirbúningstímabil, þá voru einhver teikn á lofti um að tímabilið myndi fara á annan veg hjá Breiðhyltingum. Og það gerði það. Þetta var fyrsta tímabil ÍR í næst efstu deild í fimm ár en þeir höfðu setið fastir í 2. deild í nokkur ár. Þeir voru tilbúnir í verkefnið og voru aldrei einhvern veginn líklegir til að falla úr Lengjudeildinni. Í staðinn blönduðu sér þeir í baráttuna um umspilið og komust að lokum í það. Í umspilinu mættu þeir Keflavík og eftir fyrri leikinn voru Keflvíkingar talinn aðeins of stór biti. En ÍR-ingar sýndu mikinn karakter, eins og þeir höfðu oft gert um sumarið, og komu næstum því til baka í seinni leiknum á útivelli. Aftur hefur þeim gengið vel á undirbúningstímabilinu og spurning hvað þeir gera í sumar.

Þjálfarinn: Það voru breytingar í Breiðholtinu í vetur en Jóhann Birnir Guðmundsson tók einn við sem aðalþjálfari eftir að Árni Freyr Guðnason hætti til að taka við Fylki. Sú ákvörðun Árna vakti ekki mikla gleði hjá stuðningsmönnum ÍR-inga og verða leikirnir þeirra við Fylki mjög áhugaverðir í sumar. Jóhann Birnir hefur verið þjálfari ÍR síðustu árin ásamt Árna og nú tekur hann einn við. Jói var frábær leikmaður á sínum ferli og var meðal annars atvinnumaður hjá Watford á Englandi. Eftir að skórnir fóru upp á hillu starfaði Jóhann sem afreksþjálfari hjá FH og sem yfirþjálfari hjá Keflavík.

Álit Badda
Baldvin Már Borgarsson, þjálfari Árbæjar, er sérfræðingur Fótbolta.net fyrir Lengjudeildina. Hann rýnir í öll liðin fyrir tímabilið sem er framundan.
Klúbburinn er drifinn áfram af ástríðu og hjarta
„ÍR-ingar eru á leið inn í áhugavert tímabil. Þeir hafa misst rosalega marga uppalda leikmenn sem einnig voru burðarásar í liðinu, klúbburinn er drifinn áfram af ástríðu og hjarta svo það verður áhugavert að sjá hvort liðið nái að taka frábært tímabil í fyrra með sér inn í þetta þrátt fyrir að hafa misst lykilmenn."

„Jói virkar á mig sem frábær þjálfari og hafa þeir verið klókir á markaðnum, tildæmis með því að sækja Kalla frá mér úr Árbæ en hann myndar öflugt hafsentapar með Marc, ÍR-ingar eru ekkert að flækja knattspyrnufræðin og munu vera þéttir og beinskeyttir."

„ÍR fékk á sig átta mörk á heimavelli í fyrra og þarf að halda áfram að gera vígi úr Mjóddinni, þeir eru með snarbilaða stuðningsmenn sem leggja líf og sál í stuðning við félagið sem rímar vel við þessa ástríðu og hjarta sem ég nefndi hér ofar, ef allt smellur verða ÍR-ingar öflugir og erfiðir að eiga við, þeir eru þó brothættir og ég á enn eftir að sjá hver ætlar að raða inn mörkum í fjarveru Braga Karls."

Leiðin úr Lengjunni er hlaðvarpsþáttur tileinkaður næst efstu deild karla í fótbolta. Þáttarstjórnendur eru Stefán Marteinn Ólafsson, Sverrir Örn Einarsson og Sölvi Haraldsson. Þeir velja tvo lykilmenn og einn sem gaman verður að fylgjast með úr hverju liði í Lengjudeildinni.

Lykilmenn: Marc McAusland og Kristján Atli Marteinsson
Marc McAusland er liðsins og maðurinn sem bindir varnarleikinn saman. Þótt hann sé ekki uppalinn ÍR-ingur og býr á suðurnesjunum er hann með alvöru ÍR hjarta sem smitar út frá sér í liðið. Það sást í fyrra hversu mikilvægur hann er fyrir liðið. Klárlega einn besti leiðtogi Lengjudeildarinnar og með betri mönnum landsins að verjast í lágri blokk sem hentar ÍR liðinu mjög vel. Hann er ekki hræddur að öskra á menn og halda þeim á tánum sem er gott fyrir ÍR liðið. Kristján Atli kom inn í ÍR liðið fyrir seinasta tímabil, sama tíma og Marc, og er einstakur leikmaður og karakter. Það er aldrei að spurja að því með Kristján, hann gefur sig alltaf 110% fram og neitar að gefast upp. Hann hefur strax stimplað sig inn í hjörtu ÍR-inga og er afar mikilvægur fyrir ÍR liðið. Kristján er með risa ÍR hjarta og á stóran þátt í þessari geðveiki sem er í gangi í Seljahverfinu.

Gaman að fylgjast með: Hákon Dagur Matthíasson
Hákon er 19 ára leikmaður sem er uppalinn ÍR-ingur og mun fá stórt hlutverk í sumar í Breiðholtinu. Í fyrra var hann á láni í Breiðholtinu frá Víkingum en skipti nú alfarið yfir í Seljahverfið og hefur átt mjög góðan vetur eins og allt ÍR liðið. Þetta er leikmaður sem gæti sprungið út í sumar á miðsvæðinu. Sadew Vidusha er þá uppalinn ÍR-ingur og er ungur og spennandi leikmaður fæddur árið 2007 sem má hafa auga á. Hann er í yngri landsliðum Sri Lanka og hefur verið að æfa með A landsliðinu líka. Kantmaður og menn í herbúðum ÍR líkja honum oft við Riyad Mahrez.

Komnir:
Arnór Sölvi Harðarson frá ÍBV
Ívan Óli Santos frá Gróttu
Óðinn Bjarkason frá KR (á láni)
Jónþór Atli Ingólfsson frá Augnabliki
Baldur Páll Sævarsson frá Víkingi R.
Óliver Andri Einarsson frá Keflavík
Sigurður Orri Ingimarsson frá Keflavíkha
Sigurður Karl Gunnarsson frá Árbæ
Mikael Trausti Viðarsson frá Fram
Breki Hólm Baldursson frá KA (á láni)
Víðir Freyr Ívarsson frá Fram (var á láni hjá Hetti/Hugin)
Ísak Daði Ívarsson frá Víkingi (var á láni hjá Gróttu)

Farnir:
Róbert Elís Hlynsson í KR
Bragi Karl Bjarkason í FH
Óliver Elís Hlynsson í Fram
Arnór Gauti Úlfarsson í Grindavík
Sæþór Ívan Viðarsson í Hött/Hugin
Marteinn Theodórsson í Kára
Gils Gíslason í FH (var á láni)



Fyrstu þrír leikir ÍR:
3. maí, ÍR - Völsungur (Egilshöll)
9. maí, HK - ÍR (Kórinn)
16. maí, Njarðvík - ÍR (Rafholtsvöllurinn)