Glódís virtist ekkert of viss um að hún ætti að taka vítið. „Það var búið að ákveða það fyrir Þýskalandsleikinn fyrir löngu. Ég var bara búin að gleyma því og hugsaði að Karó væri að fara að taka. Þá heyri ég Steina öskra og fatta að ég ætti að taka vítið."

„Ég held ég hafi spurt Karólínu hvort hún vildi taka. Ég segi svo bara að ég ætli að taka og hún svaraði bara 'ókei' og rétti mér boltann."

„Ég var búin að ákveða hvert ég ætlaði að skjóta. Ég dró andann djúpt. Mig langaði ótrúlega mikið að skora. Þetta var gríðarlega mikilvægt stig fyrir okkur og gaman að geta hjálpa liðinu á þennan hátt. Ég sá bara netið hreyfast og hugsaði 'Jess!'. Það var ótrúlega gaman."

Íslenska liðið fékk ótrúlega mörg færi í leiknum og svekkjandi að hafa ekki tekið öll stigin. „Þetta var svekkjandi. Þær spiluðu svolítið öðruvísi en við bjuggumst við. Við bjuggumst við þeim í bullandi hápressu, en þær eru hræddar við svæðið á bak við sig... Það er svekkjandi að fara ekki heim með sigur. Við förum í heimaleikinn með sjálfstraust og góða tilfinningu," sagði Glódís en liðin mættast aftur á þriðjudag á Laugardalsvelli.