![Lengjudeildin](/images/leng_150x150.png)
Grindavík varð fyrsta liðið til að halda hreinu gegn Njarðvík er það hafði 1-0 sigur í 11. umferð Lengjudeildar karla á Rafholtsvellinum í kvöld. Á sama tíma vann ÍR þægilegan 3-0 sigur á Aftureldingu í Breiðholti.
Í Breiðholti voru það ÍR-ingar sem fögnuðu stigunum þremur með nokkuð sannfærandi frammistöðu gegn Aftureldingu.
Heimamenn voru sterkari aðilinn í fyrri hálfleiknum og áttu í raun að skora þegar rúmur hálftími var liðinn er Bragi Karl Bjarkason kom einn í gegn á móti Arnari Daða Jóhannessyni í markinu, en Bragi setti boltann yfir markið. Ólíkt ÍR-ingnum.
Í síðari hálfleiknum varð þetta einstefna. ÍR-ingar voru nálægt því að komast yfir strax í byrjun er það kom langur bolti fram völlinn og yfir Arnar Daða, sem kom út á móti, en náði að bjarga þessu rétt fyrir horn.
Þrettán mínútum síðar komust heimamenn yfir eftir klaufaskap í Arnari. Renato Punyed átti fyrirgjöf inn í teiginn og í hendur Arnars, sem missti hann inn í markið.
ÍR-ingar hömruðu járnið meðan það var heitt. Bragi Karl bætti við öðru eftir hornspyrnu. Marc Macausland vann tvo skallabolta áður en Bragi mætti til að setja boltann í netið. Sjöunda mark hans í Lengjudeildinni. Sá hefur verið frábær síðustu tvö ár.
Þegar fimmtán mínútur voru eftir gat Arnór Gauti Ragnarsson komið Aftureldingu inn í leikinn en hann fór illa með góða stöðu og setti boltann framhjá. Andlaust og súrt hjá Mosfellingum í kvöld.
Dýrkeypt klúður því á 77. mínútu gerði Kristján Atli Marteinsson þriðja og síðasta mark ÍR-inga. Hann lét vaða fyrir utan teig og fór boltinn undir Arnar Daða í markinu. Erfiður dagur hjá honum og þá ákvað Kristján að fagna ekki af virðingu við sitt gamla félag.
Lokatölur 3-0 fyrir ÍR sem er komið upp í 5. sæti deildarinnar með 16 stig en Afturelding í 6. sæti með 14 stig þar sem Grindavík vann nauman 1-0 sigur á nágrönnum sínum í Njarðvík á Rafholtsvellinum.
Njarðvíkingar voru með öll tök fyrstu mínúturnar. Aron Dagur Birnuson varði frá Dominik Radic úr þröngu færi og þá setti Oumar Diouck boltann í stöng aðeins tveimur mínútum síðar áður en Aron Dagur tók frákastið.
Grindvíkingar unnu sig betur inn í leikinn og áttu eitt ágætis færi er Kristófer Konráðs fékk boltann í teignum en skot hans beint á Aron Snær Friðriksson sem varði vel.
Aron Snær sá aftur við Kwame Quee í byrjun síðari hálfleiks en leikurinn róaðist töluvert eftir það.
Það dró ekki til tíðinda fyrr en á 83. mínútu er Adam Árni Róbertsson gerði sigurmark Grindvíkinga. Josip Krznaric átti aukaspyrnu sem fór af Dennis Nieblas og fyrir Adam sem var dauðafrír og var hann ekki í vandræðum með að klára færið og koma Grindvíkingum í forystu.
Sex mínútum eftir markið átti Kwame Quee að gulltryggja sigurinn er hann komst framhjá Aroni í markinu en setti boltann yfir markið. Sem betur fer fyrir Kwame þá kostaði þetta ekki liðið.
Lokatölur 1-0 fyrir Grindavík sem er annað liðið til að halda hreinu gegn Njarðvíkingum í sumar. Grindavík fer upp í 4. sæti með 16 stig en Njarðvíkingar í öðru sæti með 20 stig, fjórum stigum á eftir toppliði Fjölnis.
Úrslit og markaskorarar:
Njarðvík 0 - 1 Grindavík
0-1 Adam Árni Róbertsson ('83 )
Lestu um leikinn
ÍR 3 - 0 Afturelding
1-0 Arnar Daði Jóhannesson ('59 , sjálfsmark)
2-0 Bragi Karl Bjarkason ('63 )
3-0 Kristján Atli Marteinsson ('77 )
Lestu um leikinn
Lengjudeild karla
Lið | L | U | J | T | Mörk | mun | Stig |
---|---|---|---|---|---|---|---|
1. Fjölnir | 11 | 7 | 3 | 1 | 21 - 12 | +9 | 24 |
2. Njarðvík | 11 | 6 | 2 | 3 | 22 - 15 | +7 | 20 |
3. ÍBV | 11 | 5 | 4 | 2 | 23 - 13 | +10 | 19 |
4. Grindavík | 10 | 4 | 4 | 2 | 18 - 14 | +4 | 16 |
5. ÍR | 11 | 4 | 4 | 3 | 16 - 17 | -1 | 16 |
6. Afturelding | 11 | 4 | 2 | 5 | 16 - 22 | -6 | 14 |
7. Þór | 10 | 3 | 4 | 3 | 16 - 16 | 0 | 13 |
8. Þróttur R. | 11 | 3 | 3 | 5 | 18 - 17 | +1 | 12 |
9. Keflavík | 11 | 2 | 6 | 3 | 14 - 13 | +1 | 12 |
10. Leiknir R. | 11 | 4 | 0 | 7 | 13 - 19 | -6 | 12 |
11. Grótta | 11 | 2 | 4 | 5 | 17 - 26 | -9 | 10 |
12. Dalvík/Reynir | 11 | 1 | 4 | 6 | 12 - 22 | -10 | 7 |
Athugasemdir