Það er alltaf stutt í léttleikann hjá Hafnfirðingum en FH birti skemmtilegt myndband í aðdraganda næsta leik liðsins, heimaleik gegn KA sem fram fer á Kaplakrikavelli á mánudag.

FH er í „heimaleikjatörn“ um þessar mundir en liðið leikur fjóra leiki í röð á heimavelli sínum, sem er einn af þremur völlum í deildinni sem er undirlagður náttúrulegu grasi.

Gervigrasvæðingin í íslenska boltanum hefur verið mikið til umræðu og orðið nokkuð algengt að lið hreinlega kvarti yfir því að spila á náttúrulegu grasi. Það er gert gys að þessari umræðu í myndbandi FH, þar sem Kjartan Henry Finnbogason aðstoðarþjálfari liðsins fer með aðahlutverk.