Pedri, leikmaður spænska landsliðsins og Barcelona, hefur verið ansi óheppinn með meiðsli á sínum ferli og nú er óttast að hann verði frá næstu vikur og jafnvel mánuði eftir að hafa meiðst í leik gegn Þýskalandi í átta liða úrslitum á EM í gær.
Spánn vann leikinn eftir framlengingu þar sem MIkel Merino skoraði sigurmarkið undir lokin. Pedri spilaði hins vegar bara rúmlega fimm mínútur í leiknum þar sem Toni Kroos tæklaði hann illa með þeim afleiðingum að spánverjinn meiddist á hné.
Kroos var að spila sinn síðasta leik á ferlinum í gær en þessi fyrrum leikmaður Real Madrid lagði skóna á hilluna eftir leikinn. Hann sendi Pedri afsökunarbeiðni á Instagram í kjölfarið.
„Þetta er mjög mikilvægt fyrir mig: Pedri, ég biðst afsökunar og láttu þér batna. Ég ætlaði mér auðvitað ekki að slasa þig. Ég óska þér góðs bata. Þú ert frábær leikmaður," skrifaði Kroos.
