„Þetta var bara slæmt tap.“ sagði Dragan Stojanovic, þjálfari Dalvík/Reyni, eftir 4-1 tap Dalvíkinga gegn Þrótti Reykjavík í dag.
Lestu um leikinn: Þróttur R. 4 - 1 Dalvík/Reynir
Dalvíkingar hafa tekið forystuna í þremur af seinustu fjórum leikjum en ekki náð að klára leikina. Dragan er allt annað en sáttur með það.
„Fyrri hálfleikur var mjög jafn en svo tókum við forystuna í upphafi seinni hálfleiks. En við ræddum um það í klefanum eftir leik að þetta er þriðji leikurinn núna á skömmum tíma þar sem við komumst yfir en náum ekki að klára leikinn. Þetta er ekki gott. Þetta er úr karakter hjá okkur.“
Dragan var ekki sáttur með frammistöðuna undir lok leiks en hann bendir á það að það eru mikil skakkaföll í Dalvíkurliðinu sem hefur verið að gera lífið grátt fyrir þá í sumar.
„Frammistaðan var ekki nógu góð seinasta hálftíman í dag. En við erum með góða leikmenn og gott lið. Við verðum að gera betur. Þetta er pínu brekka hjá okkur núna, við verðum að laga það. Við erum búin með 11 leiki og við höfum spilað þrisvar sinnum með fullt lið. Það hefur alltaf vantað tvo til þrjá leikmenn sem er ekki gott.“
Dragan staðfesti það í viðtalinu að Dalvíkingar eru að skoða það að bæta við sig leikmönnum þegar félagsskiptaglugginn opnar á dögunum.
„Við erum bara að skoða góða leikmenn. Skiptir ekki máli hvort hann sé íslenskur eða útlenskur.“
Það eru 56 dagar síðan Dalvík/Reynir unnu seinast leik eða í 1. umferð Lengjudeildarinnar. Hvernig geta þeir snúið þessu gengi við?
„Við þurfum að byrja að vinna leiki. Við getum breytt því í næsta leik þegar Njarðvíkingar koma til Dalvík.“ sagði Dragan Stojanovic að lokum.
Viðtalið við Dragan má sjá í heild sinni í spilaranum hér að ofan.
