Danska liðið Lyngby datt í lukkupottinn er það fékk Kolbein frá Borussia Dortmund fyrir einu og hálfu ári síðan.

Fylkismaðurinn hefur átt fast sæti í byrjunarliðinu og verið með mest spennandi bakvörðum úrvalsdeildarinnar.

Kolbeinn á aðeins ár eftir af samningi sínum og er því mikil umræða um framtíð hans, en samkvæmt Tipsbladet er Holsten Kiel áhugasamt.

Holsten Kiel vann sér sæti í efstu deild Þýskalands fyrir komandi leiktíð og er í leit að vinstri bakverði, en félagið hefur þó ekki opnað viðræður við Lyngby.

Það væri áhugavert að sjá Kolbein spreyta sig á móti leikmönnum á borð við Jeremie Frimpong og Michael Olise á næstu leiktíð, en Frimpong spilar með Bayer Leverkusen á meðan Olise er að ganga í raðir Bayern München frá Crystal Palace.

Framherjinn Hólmbert Aron Friðjónsson var á mála hjá Holsten en yfirgaf félagið á dögunum eftir að samningur hans rann út.

Freyr Alexandersson, sem þjálfaði Kolbein hjá Lyngby, reyndi að fá hann til belgíska félagsins Kortrijk fyrir um hálfu ári síðan en Lyngby hafnaði tilboðinu.

Talið er að Kortrijk muni reyna aftur við Kolbein í sumar og þá hafa félög í ensku B-deildinni einnig sýnt honum áhuga.