Oliver Ekroth, varnarmaður Víkings.
„Staðan er þannig að við eigum fullt af góðum miðjumönnum, svo margir góðir leikmenn. Það sem vantar eru fleiri varnarmenn, fleiri miðverðir og að það sé meiri samkeppni í þeirri stöðu," sagði Age Hareide, landsliðsþjálfari Íslands, á fréttamannnafundi í dag.
Staðan er þannig að það vantar fleiri varnarmenn í íslenska landsliðið og það er ákveðinn hausverkur.
Því var velt upp í útvarpsþættinum Fótbolti.net í dag hvort að Oliver Ekroth og Gunnar Vatnhamar, varnarmenn Víkings, kæmust í íslenska landsliðið ef þeir væru með íslenskan ríkisborgararétt. Gunnar er færeyskur landsliðsmaður á meðan Oliver er frá Svíþjóð. Þeir hafa myndað ógnarsterkt miðvarðapar hjá Íslands- og bikarmeisturum Víkings.
„Ég var með pælingu út frá þessari miðvarðaumræðu. Við erum að horfa í deildina hér heima í Víkingsliðið og þar erum við með tvo frábæra miðverði þar í Gunnari Vatnhamar og Oliver Ekroth. Ef þessir gæjar væru með íslenskan ríkisborgararétt, væru þeir þá ekki í landsliðinu okkar?" spurði Guðmundur Aðalsteinn Ásgeirsson í þættinum.
„Þetta er mjög áhugaverð spurning," sagði Valur Gunnarsson.
„Þeir væru pottþétt í hópnum," sagði Elvar Geir Magnússon í þættinum. „Þeir myndu banka allavega."
Athugasemdir
