Tryggvi Hrafn Haraldsson leikmaður Vals skoraði 2 mörk í dag í 5-1 sigri gegn Stjörnunni. Hann var svo í viðtali eftir leik og var ánægður með úrslit kvöldsins.
Lestu um leikinn: Valur 5 - 1 Stjarnan
„Ég er bara virkilega sáttur með þessi 3 stig og að vinna einn leik svona sannfærandi, sem er kannski ekki búiðn að vera mikið af. Skora 5 mörk og ég sjálfur 2. Ég er virkilega sáttur."
Tryggvi skoraði sín fyrstu mörk á tímabilinu í kvöld en það hefur ekki gengið vel að setja boltan í netið hjá honum. Hann virkaði þó með meira sjálfstraust í þessum leik.
„Það er búið að sitja aðeins í manni að maður er ekki búinn að vera klára færin. Maður þarf bara að passa sig að hugsa ekki of mikið um það og bara núllstilla sig. Bara gott að ég náði tveimur í dag."
Tryggvi hefur fengið töluverða gagnrýni fyrir sínar frammistöður hingað til. Hann segir þó að það hafi ekki mikil áhrif á hann.
„Ég reyni að forða mér frá henni (gagnrýninni) eins og ég get og hugsa um sjálfan mig. Ég veit það mæta vel að ég get gert betur sjálfur og það er það sem skiptir máli."
Valur mætir erkiféndum sínum KR næst og má búast við hörkuleik þar.
„Mér finnst alltaf mjög gaman að spila á móti KR og öllum Völsurum. Við vitum að þetta skiptir þá miklu máli og þetta eru svona skemmtilegustu leikirnir alltaf á hverju sumri. Það er yfirleitt góð mæting, mikill hiti og góð skemmtun þannig að ég hlakka til."
Viðtalið má sjá í heild sinni í spilaranum hér fyrir ofan.