Lestu um leikinn: Austurríki 1 -  1 Ísland

Íslenska liðið fékk góð færi til að skora urmul af mörkum en þetta datt ekki alveg með liðinu.

Ísland lenti undir í fyrri hálfleiknum er Alexandra Jóhannsdóttir gerðist brotleg en Glódís Perla Viggósdóttir jafnaði úr víti fimmtán mínútum fyrir lok venjulegs leiktíma.

„Mér líður bara allt í lagi með þetta núna eftir að hafa komið til baka. Auðvitað líður manni betur en að missa niður eitthvað forskot, en held að þetta hafi verið bara allt í lagi. Góður seinni hálfleikur þannig við getum tekið það með okkur í næsta leik,“ sagði Guðný við Fótbolta.net.

Dómgæslan var furðuleg á köflum. Leikurinn fékk ekki að rúlla og voru aukaspyrnur dæmdar við minnstu snertingu. Það fór í taugarnar á leikmönnum og var Guðný þar með talin, en hún fékk að líta gula spjaldið fyrir að sparka boltanum í burtu.

„Já, ég var aldrei eitthvað stressuð. Þetta var skrítinn leikur, það var alltaf verið að stoppa. Aukaspyrnur og við stóðum í línu að verjast aukaspyrnum allan leikinn, sérstakur leikur, en aldrei hræddar við að fá á okkur mark. Í lokin hefði ég viljað fá þetta sigurmark en það kemur í næsta leik.“

„Ég lét það aðeins fara í hausinn á mér og nældi mér í heimskulegt gult spjald. Ég verð að passa upp á að það gerist ekki en þetta var orðið svolítið þreytandi. Leikurinn gekk voða lítið. Það var dæmt á allt sem við gerðum en það er bara þannig stundum.“

Ólöf Sigríður Kristinsdóttir fékk gott færi til að landa sigrinum fyrir Ísland undir lokin en markvörður heimakvenna varði vel. Eins og áður kom fram fékk Ísland færin til að vinna leikinn en boltinn vildi bara ekki inn.

„Algerlega. Skallinn hjá Ollu var mjög nálægt og fleiri færi þar sem við hefðum algerlega getað unnið en það verður að bíða þangað til næst.“

Þjóðirnar eigast aftur við á þriðjudag en þá er spilað á Laugardalsvelli. Guðný er spennt fyrir þeim leik.

„Mér fannst þetta mjög jákvætt og sérstaklega þar sem við eigum heimaleikinn eftir á móti sama liði. Ég er bjartsýn fyrir það.“

„Mjög spennt og verður ótrúlega gaman. Vonandi mætir fólk á völlinn og býr til alvöru stemningu á þessum leik,“ sagði Guðný en hún talaði einnig um tímann hjá sænska félaginu Kristianstad í viðtalinu hér fyrir ofan.