Barcelona er á flugi undir stjórn þýska þjálfarans Hansi Flick en liðið slátraði Real Valladolid, 7-0, á Nou Camp í dag.

Brasilíski vængmaðurinn Raphinha er að njóta sín í byrjun tímabils, en hann kom að fimm mörkum í leiknum.

Hann kom Börsungum á bragðið á 20. mínútu áður en Robert Lewandowski bætti við öðru fjórum mínútum síðar. Jules Kounde gerði þriðja mark Barcelona undir lok hálfleiksins.

Raphinha skoraði tvö mörk á átta mínútna kafla í síðari hálfleiknum og fullkomnaði þar með þrennu sína áður en hann lagði upp tvö mörk fyrir spænsku landsliðsmennina Dani Olmo og Ferran Torres. Raphinha er nú búinn að koma að sjö mörkum á leiktíðinni.

Hinn 17 ára gamli Lamine Yamal átti tvær stoðsendingar í leiknum.

Barcelona hefur unnið alla fjóra leiki sína í deildinni á tímabilinu og er með markatöluna 13-3.