Kirby, sem er 31 árs gömul, eyddi níu árum hjá Chelsea þar sem hún vann samtals fjórtán titla.

Tvisvar hefur hún verið valin besti leikmaður deildarinnar. Fyrst tímabilið 2017-2018 og síðan aftur þremur árum síðar. Á tíma hennar hjá Chelsea skoraði hún 115 mörk í 205 leikjum.

Enska landsliðskonan er talin með þeim allra bestu í sögu deildarinnar og er þetta því gríðarlegur hvalreki fyrir Brighton sem hafnaði í 9. sæti deildarinnar á síðustu leiktíð.

Kirby var í enska landsliðshópnum sem vann Evrópumótið árið 2022 en gat ekki verið með á HM á síðasta ári vegna meiðsla. England komst þá í úrslitaleikinn.

Hjá Brighton hittir hún Maríu Þórisdóttur. María er dóttir Þóris Hergeirssonar, þjálfara norska kvennalandsliðsins í handbolta.

Þær voru einmitt liðsfélagar hjá Chelsea og hafði Kirby samband við hana til að fá betri tilfinningu fyrir verkefningu sem er í gangi hjá Brighton.

„Ég vildi halda áfram í deildinni og átti ég afar spennandi samtöl við Brighton og fyrrum liðsfélaga minn, Maríu, um metnað félagsins varðandi framtíðina,“ sagði Kirby við heimasíðu félagsins.

Eins og sjá má á myndinni sem fylgir fréttinni ræddu Kirby og María einnig saman þegar enska landsliðskonan var kynnt til leiks hjá Brighton. Greinilega mjög nánar.