Kylian Mbappe, stjarna Frakklands, mun mæta átrúnaðargoði sínu, Cristiano Ronaldo, í síðasta sinn á Evrópumóti er Frakkland og Portúgal mætast í 8-liða úrslitum í kvöld.
Það er ekkert leyndarmál að Mbappe elskar Ronaldo og allt það sem hann hefur gert fyrir fótboltann.
Frakkinn var með plaköt af Portúgalanum um allt herbergi á yngri árum sínum, en í dag eru þeir að mætast á stærsta sviðinu.
„Það er þessi aðdáun sem ég hef alltaf haft fyrir leikmanninum Ronaldo. Ég hef fengið tækifæri til að kynnast honum á síðustu árum og talað mörgum sinnum við hann. Við erum enn í sambandi.“
„Hann er alltaf að reyna gefa mér ráð og vill alltaf vita hvað er í gangi í mínu lífi. Að spila gegn honum er alger heiður og bara fyrir allt sem hann hefur gert í fótboltanum.“
„Hvað sem gerðist fyrir eða mun gerast eftir það, þá verður hann alltaf goðsögn leiksins. Auðvitað vonumst við samt eftir því að vinna og komast í undanúrslit,“ sagði Mbappe um Ronaldo.
Athugasemdir