„Það hjálpaði ekki að við vorum í mjúka horninu í fyrri hálfleik og andstæðingurinn með andskoti öflugan framherja í Söndru Maríu," sagði Ólafur Kristjánsson þjálfari Þróttar eftir 2 - 4 tap heima gegn Þór/KA í Bestu-deildinni í dag.
Lestu um leikinn: Þróttur R. 2 - 4 Þór/KA
Þór/KA var 0-3 yfir í hálfleik og Sandra María Jessen skoraði öll mörkin.
„Það leit ekki vel út í fyrri hálfleik en það sem við vorum að gera í seinni hálfleik var það sem ég tek út úr leiknum og var mjög ánægður með."
Hvað gerist, það var eins og Þróttur hafi varla verið með í þessum leik í fyrri hálfleik? „Það er hárrétt hjá þér, en það var ekkert varla, við vorum bara ekki með í leiknum. Stigum illa upp í pressu, liðið var mjög gisið, hékk ekki saman, fórum ekki í návígi og þær spiluðu okkur sundur og saman."
Ólafur gerði tvær skiptingar í hálfleik. Hvað var hann að hugsa með þeim? „Það er ýmislegt sem maður er að hugsa með skiptingum en það þurfti bara orku inn. Ég var með leikmenn á bekknum sem sitja líka og horfa upp á liðsframmistöðu sem var ekki góð. Þær sem komu inná gripu tækifærið en mér fannst líka þær sem voru í fyrri hálfleiknum og áfram í þeim seinni hafa stigið upp. Það var meiri þéttleiki, við fórum betur upp í pressu, vorum öruggar á boltanum og úrslitaatriðið, við fórum í návígi."
Það var allt annað Þróttarlið sem kom út í seinni hálfleikinn. Aðspurður hvað hann hafi sagt í hálfleik sagði Ólafur: „Ég sagði mjög fátt og mjög lítið. Engin læti en höfðaði bara til þess að okkur væri ekki sómi af fyrri hálfleiknum. Mér finnst liðið hafa sett ákveðna standarda með spilamennsku og frammistöðu og við þurftum að á þeim í seinni hálfleik. Þær gerðu það svo sannarlega."
Nánar er rætt við hann í spilaranum að ofan.
Athugasemdir