Eva Lind Daníelsdóttir reyndist hetja Keflavíkur er hún skoraði eina mark leiksins er Keflavík lagði lið Fylkis í sannkölluðum botnslag er liðin mættust á HS-Orkuvellinum í Keflavík fyrr í dag. Í ofanálag var um að ræða fyrsta mark Evu í efstu deild og því ekki von á öðru en að hún væri kampakát er hún mætti í viðtal við Fótbolta.net að leik loknum.
Lestu um leikinn: Keflavík 1 - 0 Fylkir
„Tilfinningin er geggjuð, ég er ótrúlega sátt með þetta og stolt af liðinu en við vorum geggjaðar allar.“ Sagði Eva um tilfinninguna í leikslok.
Leikurinn sem slíkur var mjög lokaður og afar lítið um nokkuð sem færi má kalla. Var Eva sammála fréttaritara að varnarleikur liðsins væri fyrst og fremst að þakka sigurinn?
„Já ég myndi segja það. Við unnum allar mjög vel saman og vorum tilbúnar í allar tæklingar.“
Eva sem líkt og fyrr segir skoraði sitt fyrsta mark í efstu deild í dag gerði það með bylmingsskoti af vítateigslínu. Vissi hún strax að boltinn var á leið í netið?
„Nei ég var smá hrædd um að hún myndi ná að pota í hann þarna en þetta var geggjað.“
Sagði Eva Lind en allt viðtalið við hana má sjá hér að ofan.
Athugasemdir