Olise, sem er 22 ára gamall, hefur verið með bestu mönnum Palace síðustu tvö tímabil.

Hann kom að sextán deildarmörkum í nítján leikjum á síðustu leiktíð en eftir tímabilið höfðu mörg félög áhuga á að fá hann.

Chelsea, Arsenal og Manchester United voru öll sögð áhugasöm, en hann taldi besta skrefið að fara til Bayern München sem virkjaði kaupákvæði í samningi leikmannsins.

Olise stóðst læknisskoðun í München í dag og skrifaði í kjölfarið undir fimm ára samning.

„Viðræðurnar við Bayern voru mjög svo jákvæðar og er ég ánægður að vera spila fyrir svona stórt félag. Þetta er frábær áskorun og það er nákvæmlega það sem ég var að leitast að. Ég vil sanna mig á þessu stigi og spila mitt hlutverk í að tryggja að við vinnum sem flesta titla fyrir félagið á næstu árum,“ sagði Olise við heimasíðu félagsins.