Stjarnan tók á móti Selfossi í 18. umferð Bestu deildarinnar í dag í leik sem endaði 3-0 fyrir Stjörnunni. Það var markalaust í hálfleik en á fimmtu mínútu seinni hálfleiks kom Ingibjörg Lúcía Ragnarsdóttir Stjörnunni á bragðið eftir klúður í uppspili Selfyssinga.
Lestu um leikinn: Stjarnan 3 - 0 Selfoss
„Gott að vinna leikinn, það var erfitt að berjast á móti Selfoss liðinu“ sagði Kristján Guðmundsson, þjálfari Stjörnunnar, eftir leikinn.
„Þær beittu löngum sendingum og við þurftum alltaf að vera tilbúin til að verjast því. Það gekk vel og við spiluðum ágætlega út frá því en á sóknarþriðjungnum vorum við aðeins að flýta okkur of mikið og gleymdum því sem við erum búin að vera að æfa“ bætti hann svo við.
Eins og Kristján kom inn á vantaði herslumuninn fram á við í fyrri hálfleik. Aðspurður hvað var rætt í klefanum í hálfleik segir hann:
„Það var aðal umræðuefnið í hálfleik. Við sýndum þeim hvernig sóknirnar voru að enda hjá okkur í fyrri og hjálpuðum þeim með hvernig á að klára þetta og þær gerðu það bara mjög vel.“
Það var heil umferð spiluð í Bestu deildinni í dag en þetta var síðasta umferð fyrir tvískiptinguna. Blikar töpuðu sínum leik í dag og Stjarnan er því 5 stigum á eftir þeim þegar farið er inn í úrslitakeppnina. Stjörnufólk hlýtur að horfa í Evrópusæti annað árið í röð.
„Við gerum það bara eins og öll liðin sem eru á svipuðu róli og við, Þróttur, FH, Þór/KA. Ég held að liðin fái blóð á tennurnar núna og reyni að enda eins ofarlega og mögulegt er og ef þú getur fengið Evrópusæti þá reyniru að sækja það.“
Viðtalið við Kristján má sjá í heild sinni í spilaranum hér að ofan.
