Ítalski gleðigjafinn Mario Balotelli er líklega á förum frá Genoa um áramótin en hann er sagður vera með tilboð frá mexíkóska félaginu Cruz Azul.
Balotelli, sem er 34 ára gamall, samdi við Genoa í lok október og gerði þá samning út tímabilið.
Í samningnum er klásúla um riftun sem báðir aðilar geta nýtt.
Ítalinn hefur verið í aukahlutverki hjá Genoa og aðeins spilað 56 mínútur en Andrea Pinamonti er aðalframherji liðsins sem stendur og ekki útlit fyrir að það verði breyting á því.
Framherjarnir Caleb Ekuban og Jeff Ekhator eru þá að stíga upp úr meiðslum sem gerir það að verkum að samkeppnin er orðin meira og óvíst hvort Balotelli hafi þolinmæði í það.
Samkvæmt Gazzetta dello Sport er Balotelli með tilboð frá Cruz Azul í Mexíkó en hann myndi þéna 2 milljónir evra í árslaun, sem er töluvert hærri upphæð en hann þénar hjá Genoa.
Sky á Ítalíu segir að Balotelli og Genoa munu taka ákvörðun á næstu dögum en það eru meiri líkur en minni á að hann yfirgefi félagið um áramótin.
Athugasemdir
