Pelach rekinn frá Stoke (Staðfest)

Pelach tók við Stoke 18. september eftir að Steven Schumacher var rekinn en tókst aðeins að sigra þrjá deildarleiki við stjórnvölinn hjá félaginu. Liðið er ekki búið að sigra í deildinni síðan 6. nóvember og situr í 19. sæti Championship deildarinnar, sem er talið algjörlega óviðunandi þar á bæ.

„Narcis er hæfileikaríkur þjálfari sem er gríðarlega efnilegur. Hann leggur ótrúlega mikla vinnu inn og ég hef engar efasemdir um að honum muni ganga vel í framtíðinni. Hann passar því miður ekki við Stoke City á þessum tímapunkti, úrslitin hafa ekki verið nægilega góð og því þurfum við að gera breytingar," sagði Jon Walters yfirmaður íþróttamála hjá Stoke, sem er einnig fyrrum sóknarmaður liðsins.

Annars er það að frétta í þjálfaramálum um Evrópu að danski þjálfarinn Bo Svensson hefur verið rekinn úr þjálfarastarfi Union Berlin í efstu deild þýska boltans á meðan Fatih Terim hefur verið ráðinn til Al-Shabab í Sádi-Arabíu.

Terim, fyrrum þjálfari tyrkneska landsliðsins, AC Milan og Galatasaray meðal annars, tekur við starfinu hjá Al-Shabab af Vitor Pereira sem var ráðinn til Wolves á dögunum.