Dani Olmo hefur passað vel inn í liðið hjá Barcelona og er að spila vel undir stjórn Hansi Flick.
Spænskir fjölmiðlar keppast við að greina frá því að Barcelona mun að öllum líkindum geta skráð Dani Olmo til leiks fyrir seinni hluta tímabilsins í spænska boltanum.
Börsungar virtust ekki geta skráð Olmo fyrir seinni hlutann vegna þess að laun hans hefðu rofið launaþak félagsins í La Liga deildinni miðað við innkomu.
Þeim tókst þó að selja sérstök V.I.P. sæti á Camp Nou leikvanginum sínum fyrir upphæð sem nemur um 100 milljónum evra. Þessi nýja innkoma gerir félaginu kleift að hækka launaþakið sitt í La Liga og skrá Olmo og Pau Víctor til leiks fyrir seinni hluta leiktíðarinnar.
Barcelona er búið að tapa tveimur leikjum í röð í spænsku deildinni og situr í þriðja sæti með 38 stig eftir 19 umferðir, þremur stigum eftir toppliði Atlético Madrid sem á leik til góða. Þá er liðið í öðru sæti í deildarkeppni Meistaradeildar Evrópu, með 15 stig eftir 6 umferðir.
Hinn 26 ára gamli Olmo er búinn að skora 6 mörk og gefa eina stoðsendingu í 15 leikjum með Barca á tímabilinu. Ensk úrvalsdeildarfélög á borð við Manchester City og Arsenal hafa verið orðuð við leikmanninn.
Athugasemdir
