ÍR-ingar gerðu 1-1 jafntefli við Þór á Akureyri. Hákon Dagur Matthíasson kom ÍR-ingum yfir á 13. mínútu er hann fékk boltann í gegn og setti hann af öryggi framhjá Aroni Birki Stefánssyni í markinu.

Þórsarar voru með vindinn í bakið í fyrri hálfleiknum en náðu ekki að nýta sér hann. Staðan í hálfleik 1-0 fyrir ÍR.

Gestirnir gátu komið sér í tveggja marka forystu á 54. mínútu er boltinn datt fyrir Braga Karl Bjarkason eftir hornspyrnu. Hann var í algeru dauðafæri en setti boltann í slá.

Tuttugu mínútum fyrir leikslok jöfnuðu heimamenn er Marc Rochester Sörensen fékk boltann á fjær eftir góða sendingu og stýrði boltanum í netið.

Nokkrum mínútum síðar slapp Gils Gíslason, varamaður ÍR-inga, inn fyrir en Bjarki Þór Viðarsson kom til bjargar á síðustu stundu með glæsilegri tæklingu.

Mörkin urðu ekki fleiri og lokatölur 1-1. ÍR er í 5. sæti með 32 stig en Þór í 10. sæti með 20 stig.

Sigurmark Leiknis felldi Dalvík/Reyni

Leiknismenn unnu 2-1 sigur á Dalvík/Reyni á Domusnova-vellinum í Breiðholti.

Leikurinn var meira og minna í eigu heimamanna, en það voru gestirnir sem komust óvænt í forystu. Áki Sölvason fékk boltann í teignum, algerlega einn og óvaldaður, og kom honum í netið eftir sendingu Armin Guerrero.

Franko Lalic var að eiga stórleik í marki Dalvíkinga. Hann varði hvert skotið á fætur öðru en kom engum vörnum við þegar Sindri Björnsson stangaði sendingu Shkelzen Veseli í netið undir lok fyrri hálfleiks.

Heimamenn voru sterkari í síðari hálfleiknum en náðu ekki að skapa sér mörg dauðafæri. Róbert Quental Árnason átti fínasta færi sem hann setti rétt framhjá markinu og þá fékk Áki færi hinum megin á vellinum, en boltinn beint í hendur Viktors í marki Leiknismanna.

Átta mínútum fyrir leikslok kom sigurmark Leiknis. Varamaðurinn Kári Steinn Hlífarsson fékk boltann inn á teignum og setti hann framhjá Lalic í markinu. Svekkjandi fyrir Lalic sem var að eiga einn besta leik sinn í sumar.

Leiknismenn eru nú með 24 stig í 9. sæti deildarinnar en Dalvík/Reynir í neðsta sæti með 13 stig nú fallið niður í 2. deild.

Þór 1 - 1 ÍR
0-1 Hákon Dagur Matthíasson ('13 )
1-1 Marc Rochester Sörensen ('69 )
Lestu um leikinn

Leiknir R. 2 - 1 Dalvík/Reynir
0-1 Áki Sölvason ('24 )
1-1 Sindri Björnsson ('45 )
2-1 Kári Steinn Hlífarsson ('82 )
Lestu um leikinn