Sheffield United lagði Watford að velli, 1-0, í ensku B-deildinni á Bramall Lane í dag, en sjálfsmark á 2. mínútu leiksins skildi liðin að.

Heimamenn gátu ekki beðið um betri byrjun. Callum O'Hare dansaði með boltann við endalínuna hægra megin, keyrði í átt að marki og setti boltann í Daniel Bachmann, markvörð Watford, og í netið.

Markið var skráð sem sjálfsmark á Bachmann þar sem skot hans var ekki á leið í netið og er því markvörðurinn skráður fyrir markinu.

Bachmann var fljótur að bæta upp fyrir sjálfsmarkið. Sheffield United fékk vítaspyrnu á 16. mínútu og var það Kieffer Moore sem steig á punktinn en Bachmann sá við honum með góðri vörslu.

Watford skapaði sér ekki mörg færi. Þeirra besta færi kom í síðari hálfleiknum en þá átti Ryan Andrews skot af löngu færi í stöng.

Heimamenn hefðu hæglega getað skorað fleiri mörk í dag en Bachmann var í essinu sínu og varði allt sem kom að honum. Lokatölur 1-0 fyrir Sheffield United sem er með 6 stig í 8. sæti en Watford í 3. sæti með 9 stig.