Franski sóknarmaðurinn Alexandre Lacazette er búinn að ná samkomulagi við Al Quadsiah í Sádi-Arabíu en þetta segir Santi Aouna hjá Footmercato.
Al Quadsiah vann B-deildina í Sádi-Arabíu á nýafstaðinni leiktíð og verður því nýliði í efstu deild.
Félagið er stórhuga fyrir sumarið og er þegar byrjað að ræða við nokkrar stjörnur úr Evrópuboltanum.
Samkvæmt Aouna er félagið í beinum viðræðum við franska félagið Lyon um Alexandre Lacazette, en það hefur náð samkomulagi við leikmanninn um kaup og kjör.
Lyon er þegar byrjað að horfa í kringum sig í leit að arftaka Lacazette sem skoraði 22 mörk í 39 leikjum á leiktíðinni.
Lacazette, sem er uppalinn hjá Lyon, lék í fimm ár með enska félaginu Arsenal.
Athugasemdir