Lestu um leikinn: Ísland 2 -  1 Austurríki

„Að vera komin aftur á Laugardalsvöll og fagna aftur með aðdáendunum var frábær upplifun," sagði Ingibjörg en henni fannst gaman að spila í vindinum.

„Við vitum að við erum sterkar á heimavelli. Veðrið er eins og það er á Íslandi. Við getum nýtt það okkur til góðs og mér fannst við gera það í dag."

Ingibjörg er uppalin í Grindavík og er vön miklu meira roki. „Þetta er bara gola miðað við Grindavík í gamla daga," sagði Ingibjörg létt.

Ísland spilaði vel í þessum tveimur leikjum gegn Austurríki. „Mér fannst við meira og meira vera að sýna okkar einkenni. Við erum með kynslóðarskipti núna en mér finnst við vera að komast í takt við það sem við vorum fyrir nokkrum árum. Ungu stelpurnar eru virkilega að stíga upp og það er svo gaman að fylgjast með því."

Guðrún Arnardóttir, félagi Ingibjargar úr vörninni, sýndi magnaða takta í fyrsta marki Íslands. Hún er vön því að sýna góða takta varnarlega en kannski aðeins minna sóknarlega.

„Hún á fyrsta markið. Ég hef ekki hugmynd hvaðan þetta kom. Hún bara hélt áfram og gerði það sem hún gerði. Guðrún er með gæði, það vita allir. Hún er klár leikmaður og les stöðuna vel. Þetta var bara flott."

Hægt er að sjá allt viðtalið í spilaranum hér fyrir ofan.