Lestu um leikinn: Austurríki 1 -  1 Ísland

„Mér fannst við vera sterkari aðilinn heilt yfir og alltaf líkleg þegar við nálguðumst markið, náðum að opna þær og koma okkur í góðar stöður og góð færi. Við gerðum þeim mjög erfitt fyrir og mér fannst þetta góður leikur hjá okkur."

Glódís Perla Vigósdóttir fyrirliði Íslands skoraði markið okkar úr víti í dag en það kom mörgum, þar á meðal henni á óvart að hún væri vítaskytta liðsins.

„Það er langt síðan ég sagði henni að hún væri vítaskytta en hún var búin að steingleyma því þegar vítið var dæmt. Ég þurfti að minna hana á það þegar einhver annar ætlaði að taka vítið. Þá þurfti ég að öskra því Glódís var búin að steingleyma að hún væri vítaskytta. Við ræddum þetta fyrir einhverju síðan en svo var hún bara búin að gleyma því. Hún er góður spyrnumaður og hefur trú og traust á því sem hún er að gera, og er með bullandi sjálfstraust."

Fyrir leik var óheppilegt klaufaatvik hjá íslenska teyminu því það gleymdis að skrá Selmu Sól Magnúsdóttur og Kristínu Dís Árnadóttur á leiksskýrslu svo þeim var vísað upp í stúku. Aðspurður um það atvik sagði Þorsteinn:

„Þetta eru bara mannleg mistök hjá starfsmanni knattspyrnusambandsins. Maður getur ekkert sagt við því þannig en auðvitað þurfum við að setjast yfir það hvernig við ætlum að leysa svona hluti. Þetta er bara mannlegt og við getum öll gert mistök í lífinu, enginn er fullkominn. Það gera allir einhvern tíma mannleg mistök og við þurfum að styðja við þann einstakling og áfram gakk."

Fyrirfram hefði mátt búast við að Selma Sól yrði fyrsti eða annar leikmaður af bekk. Pirraði þetta hann ekkert?

„Auðvitað pirrar þetta mig því það minnka möguleikarnir. En þegar maður getur ekki breytt einhverju þá þarf maður að tækla hlutina á annan hátt. Ég gat ekki breytt neinu á þessum tímapunkti og þurfti að vinna úr því sem ég hafði. Ég hef enga trú á að þetta komi fyrir aftur, við lærum af þessu, mistök eru til að læra af sama hvernig þau eru."