Lestu um leikinn: Austurríki 1 -  1 Ísland

Sædís Rún Heiðarsdóttir var skráð í hópinn fyrr í dag, en hún er ekki með vegna meiðsla. Fótbolti.net fékk þær upplýsingar að nafn Kristínar Dísar ætti að vera þarna en um einhverja villu væri að ræða. Núna er komið í ljós að þetta var ansi stór villa en Selma Sól er ekki heldur í lokahópnum.

Þetta er afskaplega klaufalegt, svo ekki sé meira sagt.

„Vegna tæknilegra örðugleika við skráningu í mótakerfi UEFA og afleiddra mannlegra mistaka verða þær Kristín Dís Árnadóttir og Selma Sól Magnúsdóttir ekki í leikmannahópi A kvenna gegn Austurríki í dag," segir í tilkynningu KSÍ.

„Fulltrúar KSÍ hafa gert allt sem í þeirra valdi stendur til að leysa málið með fulltrúum UEFA, en án árangurs."

Þetta er afskaplega klaufalegt. Selma Sól hefði líklega verið með fyrstu leikmönnum inn af bekknum, en fær ekki að spila. Líka er þetta auðvitað svekkjandi fyrir Kristínu sem hefði verið góður möguleiki í vörnina. Kristín, sem leikur fyrir Bröndby í Danmörku, kom inn í hópinn fyrir síðasta verkefni en var send heim stuttu fyrir fyrri leikinn í verkefninu þegar í ljós kom að Sædís Rún gat spilað. Núna er hún ekki með heldur.