Belgía: Fyrsti sigur Atla Barkar
Í gærkvöldi var Atli Barkarson í byrjunarliði Zulte Waregem þegar liðið sigraði Lokeren Temse á heimavelli í belgísku B-deildinni. Þetta var annar leikur Atla með liðinu en hann var keyptur frá Sönderjyske í glugganum.

Waregem ætlar að koma sér upp í deild þeirra bestu. Liðið er í 10. sæti með fjögur stig eftir þrjá leiki.

Holland: Helgi Fróði á toppnum
Helmond komst í gær á topp hollensku B-deildarinnar með 3-0 heimasigri á Venlo. 4. umferðin klárast í dag og Oss, sem situr í 2. sæti, getur náð toppsætinu með sigri gegn FC Volendam.

Helgi Fróði Ingason, sem keyptur var frá Stjörnunni í glugganum, byrjaði á bekknm hjá Helmond en kom inn á í upptbótartíma seinni hálfleiks. Þetta var þriðji leikur Helga með Helmond, en hann var í byrjunarliðinu gegn Emmen í leiknum á undan.

Danmörk: Sigur hjá AB sem komst á toppinn - Breki kom ekki við sögu
Breki Baldursson var ónotaður varamaður í liði Esbjerg sem sigraði Roskilde á útivelli í gær. Esbjerg er í 2. sæti dönsku B-deildarinnar. Þetta var í annað sinn sem Breki er í hópnum hjá Esbjerg eftir komuna frá Fram í sumar.

Í dag vann svo Íslendingalið AB sinn þriðja leik í röð í dönsku C-deildinni. Jóhannes Karl Guðjónsson er þjálfari liðsins og þeir Ágúst Eðvald Hlynsson og Ægir Jarl Jónasson byrjuðu leikinn í dag.

O'Vonte Mullings skoraði sigurmark AB á 36. mínútu. AB er með tíu stig í toppsæti C-deildarinnar sem stendur.

Þýskaland: Preussen þarf á Hólmberti að halda
Preussen Munster tapaði í dag 4-1 á útivelli gegn HSV í þýsku B-deildinni. Hólmbert Aron Friðjónsson skrifaði undir hjá Preussen í gær og var ekki í leikmannahópi liðsins í dag.

Preussen, sem er nýliði í B-deildinni, hefur einungis fengið eitt stig úr fyrstu fjórum leikjunum og einungis skorað tvö mörk.