Tindastóll vann lífsnauðynslegan leik í fallbaráttunni í Bestu deild kvenna í dag er liðið lagði Keflavík að velli, 2-1, á Sauðárkróksvellinum á Sauðárkróki.

Jordyn Rhodes kom Stólunum í 1-0 á 27. mínútu. Birgitta Rún Finnbogadóttir komst inn fyrir, lagði boltann út í teiginn á Jordyn sem setti hann í netið.

Keflavík svaraði fyrir sig undir lok hálfleiksins. Simona Rebekka Meijer fékk boltann upp úr engu í teignum, kom honum yfir Monicu Wilhelm í markinu og inn.

Þrettán mínútum fyrir leikslok skoruðu Stólarnir sigurmarkið og var þar að verki Aldís María Jóhannsdóttir. Jordyn átti skot sem Vera Varis varði út á Aldísi og var eftirleikurinn auðveldur.

Lokatölur 2-1 á Króknum. Tindastóll er með 16 stig í öðru sæti fallriðilsins, sex stigum fyrir ofan Fylki og Keflavík.