Það verður mikið húllumhæ í kringum Laugardalsvöll fyrir leikinn; flautað verður til leiks klukkan 19:30 en fyrir leik verður Fan Zone á vellinum. DJ Dóra Júlía og Herra Hnetusmjör munu sjá um að keyra upp stemninguna, matarvagnar verða á svæðinu og hægt verður að fá andlitsmálun. Einnig verður landsliðsvarningur til sölu.

Fan Zone-ið opnar klukkan 17:00 og þarf miða á leikinn til að hafa aðgang að því.

Hægt er að kaupa sér miða á völlinn á Tix.is.

Þetta er okkar völlur
Glódís Perla Viggósdóttir, landsliðsfyrirliði, sat fyrir svörum á fréttamannafundi í gær. Hún vonast auðvitað til að sem flestir leggi leið sína á Laugardalsvöll í kvöld og styðji við bakið á liðinu í þessum mikilvæga leik.

„Við höfum verið að spila á Kópavogsvelli og það hefur verið mjög góð stemning þar. Okkur hefur þótt rosalega vænt um hversu margir hafa komið og stutt við okkur í vondu veðri. Við vonum að það haldi áfram á morgun. Við Íslendingar erum þekkt fyrir það út í heimi að standa með okkar íþróttafólki og við stöndum þétt saman sem þjóð. Við vonum að Íslendingar vilji koma á morgun og styðja við bakið á okkur í þessum gríðarlega mikilvæga leik," sagði Glódís og bætti við:

„Það kom mér eiginlega á óvart hvað það fór okkur vel að vera á Kópavogsvelli. Það eru margar í liðinu sem spiluðu þar lengi og það er heimavöllur fyrir Steina og margar í liðinu. Það var ótrúlega fínt að spila þar og í ljósi aðstæðna gekk það vel upp. Persónulega finnst mér skemmtilegra spila hér. Mér finnst þetta vera okkur völlur. Mér líður meira eins og það sé landsleikur þegar við spilum hérna. Grasið lítur vel út og ég held að þetta verði hörkugaman."

Eins og áður segir, þá verður flautað til leiks klukkan 19:30.