| þri 04.ágú 2020 23:05 Mynd: Heimasíða CSKA |
|
Arnór og Hörður um Covid-19: Þetta er ekkert feimnismál
Íslensku landsliðsmennirnir Arnór Sigurðsson og Hörður Björgvin Magnússon misstu af lokaumferð rússnesku deildarinnar með CSKA Moskvu eftir að grunur kom upp um að þeir hefðu smitast af Covid-19. Leikmennirnir voru skipaðir í sóttkví og voru prófaðir aftur um helgina en prófið reyndist þá neikvætt. Fótbolti.net heyrði í þeim hljóðið í kvöld.
Hörður Björgvin Magnússon
Arnór Sigurðsson
Tímabilið byrjar aftur næstu helgi
Einum degi fyrir leikinn fóru leikmenn CSKA í Covid-próf og kom í ljós að sýni frá Arnóri og Herði var jákvætt en þó veikt. Teymi CSKA tók enga sénsa og því voru þeir skipaðir í sóttkví. Misstu þeir því af lokaumferðinni en Krasnodar vann sinn leik og tryggði sæti sitt í Meistaradeildinni á meðan CSKA spilar í Evrópudeildinni.
Þeir félagarnir hafa því dvalið heima hjá Herði síðustu tíu daga eða svo en þeir ræddu um allt ferlið við Fótbolta.net.
„Það er ekkert feimnismál að ræða þessa reynslu af Covid-19-veirunni en það er þó enn óskýrt hvort við höfum smitast af henni eða ekki. Við fórum í próf á mánudegi, einum degi fyrir leik, en það reyndist jákvætt en þó veikt. Þjálfarateymið tók enga sénsa og því fórum við í sóttkví og vorum ekki með í lokaumferðinni," sagði Hörður Björgvin.
Arnór hefur dvalið heima hjá Herði frá því þeir félagar fóru aftur til Rússlands en þeir eru búnir að hafa það náðugt í sóttkvíinni.
„Við höfum reynt að nýta tímann eins vel og hægt er. Þetta er tíminn fyrir hugmyndaflugið. Við höfum eldað góðan mat, spilað tölvuleiki og auðvitað talað við fjölskyldu og vini, það hefur hjálpað heilmikið en á sama tíma reynir á að vera í sóttkví og maður hefur lært mikið af þessu," sagði Arnór.
Þetta kom sér sérstaklega illa fyrir þá en leikmenn liðsins fengu níu daga frí áður en nýtt tímabil fer af stað en það frí fór til spillis og því frestaðist það um ókominn tíma að hitta fjölskyldu og vini.
„Þetta er auðvitað ótrúlega erfitt. Ég og Móeiður kærasta mín eignuðumst dóttur í lok apríl og hefur maður lítið fengið að sjá hana og var þetta frábær gluggi til að hitta þær og fjölskylduna en svo kemur þetta upp. Maður sýnir auðvitað skilning að taka allar þær varrúðarráðstafanir sem þarf að taka þegar kemur að veirunni," sagði Hörður ennfremur.
Þeir fóru aftur í próf við veirunni um helgina og var prófið neikvætt. Þeir eru því ekki lengur í sóttkví og geta hafið æfingar með CSKA. Þeir hafa fylgst vel með ástandinu í Rússlandi og fylgt öllum reglum.
„Við höfum fylgst vel með frettum af veirunni. Þetta er náttúrlega fjölmennt land og hefur verið mikið af smitum í landinu. Enn maður hefur lesið síðustu daga að Rússland verður fyrsta landið í Evrópu til að prófa bóluefni við veirunni og gerist það í október. Vonandi mun það bera árangur. Þetta eru fordæmalausir tímar eins og hefur svo oft verið nefnt og hægt að draga mikinn lærdóm af þessu," bætti Arnór við.
Nú taka við strangar æfingar með CSKA en fyrsti deildarleikur er um helgina gegn Khimki, liðinu sem mætti Zenit í úrslitum rússneska bikarsins á dögunum. Óvíst er hvort þeir verði með í fyrstu umferðinni.
„Við höfum ekki æft neitt og það var æfingaleikur á dögunum, þannig það er ekki klárt hvort við verðum með um helgina. Það á eftir að koma betur í ljós. Það er fyrsta æfing á morgun, það er langt tímabil framundan og við getum ekki beðið eftir að komast af stað," sagði Hörður í lokin.
