Kolbeinn: Met möguleika mína á að spila á HM vera góða

Hann hefur verið á meiðslalistanum síðan hann skoraði sigurmarkið sögulega gegn Englandi í hreiðrinu í Nice á EM 2016.

„Það er pínu skrýtið að vera mættur aftur en æðisleg tilfinning," segir Kolbeinn um það að vera kominn aftur í landsliðsverkefni.

„Það hefur verið mikil óvissa um framhaldið hjá mér í marga mánuði. Það voru mörg spurningamerki þegar ég fór aftur út til Nantes í síðasta mánuði. Hvernig höndla ég álagið að byrja æfa með liðinu? Svo náttúrulega stærsta spurningin: Get ég eitthvað lengur? Það kom sjálfum mér pínu á óvart hversu gott standið á mér var, miðað við hvað ég var búinn að vera lengi frá."

„Læknar sögðu mér að íhuga það alvarlega að leggja skóna á hilluna. Það var ekki auðvelt að heyra það“
„Fyrir ári síðan, eftir fyrstu aðgerðina, fór ég í læknisskoðun hjá Nantes og hitti aðra lækna. Sumir þeirra sögðu mér að íhuga það alvarlega að leggja skóna á hilluna. Það var að sjálfsögðu ekki auðvelt að heyra það. Ég get verið sáttur við að vera kominn á þennan stað í dag miðað við hversu illa þetta leit út á tímabili."

„Það var ekki víst hvort önnur aðgerð myndi laga eitthvað eða ekki. Það var ákveðin áhætta að fara í seinni aðgerðina en hún gekk mjög vel. Jón Karlsson (læknir) var mjög sáttur við þá aðgerð og sagði mér að hún hefði heppnaðist vel og ég ætti góða möguleika á að ná fullum styrk á ný.," segir Kolbeinn.

Hann segir að það hafi reynt mjög á að geta ekki spilað fótbolta í svona langan tíma.

„Þetta er svipuð tilfinning og að taka bolta frá litlu barni sem vill leika sér. Ég hef verið í fótbolta síðan ég gat staðið. Það er frábært að geta verið kominn aftur en vissulega var þetta erfiður tími. Það var erfitt að fylgjast með landsliðinu í undankeppninni og geta ekki tekið þátt. Þetta var frábær undankeppni og sterkt að geta haldið svona dampi eftir velgengnina á EM, það kom mörgum á óvart. Liðið átti 100% skilið að vinna riðilinn"

Kolbeinn heldur í drauminn um að spila með Íslandi á HM í Rússlandi í sumar.

„Það er æðislegt að ég eigi enn þann möguleika á að geta farið á HM," segir Kolbeinn. En hvernig metur hann þá möguleika í dag?

„Ég met þá bara góða. Aðalatriðið fyrir mig núna er að haldast heill. Það er hætta á að meiðast eftir svona langa fjarveru. Það er mikilvægt að halda mér heilum og passa mig á að það komi ekki bakslag. Þá er ég með tvo og hálfan mánuð til að byggja mig upp og ná að spila mikilvægar mínútur og að sjálfsögðu skora nokkur mörk. Ég ætla að koma mér í liðið hjá Nantes. Það er markmiðið mitt á þessum tímapunkti."

Var erfitt að ræða þetta í fjölmiðlum
Kolbeinn hefur haldið sig frá sviðsljósi fjölmiðla þann tíma sem hann hefur verið meiddur og ekki gefið viðtöl. Var það meðvituð ákvörðun hjá honum að vera nánast „ósýnilegur" í gegnum þetta ferli?

„Já, það má segja það í raun og veru. Það var alltaf það mikil óvissa að eina vikuna gat ég sagt að það væri eitthvað jákvætt að gerast og svo öfugt í þeirri næstu. Það var erfitt að vera að ræða þetta í fjölmiðlum þegar maður vissi sjálfur ekki stöðuna eða hvað myndi gerast með framhaldið. Ég vissi að þetta yrði langt tímabil. Auk þess er ég ekki mikið fyrir sviðsljós fjölmiðla og hef ekki verið það, þó ég skilji það auðvitað að fjölmiðlar vilji vita stöðuna á mér. Ég tók þá ákvörðun að reyna að koma mér í gegnum þetta tímabil og geta talað um eitthvað jákvætt þegar ég kæmi mér úr því. Ég gat ekki gefið nein jákvæð svör í allavega eitt ár," segir Kolbeinn.

Hafði trú á því að þetta myndi blessast
Gróa á leyti fór á kreik og ýmsar sögur voru í gangi um Kolbein. Meðal annars að útilokað væri að hann gæti snúið aftur og að hann væri sjálfur hættur í fótbolta. Hann segir að sögurnar hafi ekki truflað sig.

„Ég auðvitað sjálfur vissi hvernig málin mín voru og hvað ég vildi. Ég hugsaði það auðvitað hvernig það yrði að hætta enn það kom aldrei til greina af minni hálfu og hélt áfram á minni braut. Ég hafði trú á því að þetta myndi blessast á endanum."

Kolbeinn er byrjaður að spila fyrir varalið Nantes og skoraði tvö mörk í varaliðsleik um daginn. Hann á magnaðan landsliðsferil með Íslandi og Heimir Hallgrímsson valdi hann í hópinn núna til að sjá standið á honum með eigin augum. Kolbeinn segir að það sé ansi gott fyrir sálina að farið sé að birta til í hans málum.

„Ég er búinn að bíða lengi eftir því að komast út á völl og spila fótbolta. Það er erfitt að útskýra þetta en það gefur mér mikið að geta sparkað í bolta," segir Kolbeinn.

Hann segir að samskipti sín við félagslið sitt, Nantes í Frakklandi, hafi verið góð þann tíma sem hann hefur verið á meiðslalistanum.

„Það var lítið sem hægt var að gera þannig séð. Eftir að ég kom til baka hef ég fengið frábærar móttökur frá klúbbnum og allir í kringum liðið eru mjög jákvæðir í minn garð. Mér finnst ég vera á byrjunarreit hjá félaginu og vonandi get ég gefið honum eitthvað gott til baka."

Finnur fyrir stuðningi frá Ranieri
Kolbeinn segist finna fyrir því að Claudio Ranieri, hinn geðþekki þjálfari Nantes, sé að bíða eftir sér. Ranieri er þekktastur fyrir að ná því ótrúlega afreki að hafa gert Leicester að Englandsmeisturum.

„Já ég finn mikla jákvæðni frá honum í minn garð. Hann hefur sagt mér að hann sé ánægður með það hvernig ég hef verið síðan ég kom aftur. Hann er mjög góður þjálfari og sanngjarn maður. Ef ég held áfram að banka dyrnar þá mun hann vonandi nota mig, ég er bjartsýnn um framhaldið hjá klúbbnum" segir Kolbeinn.

Hann segir að það hafi verið frábær tilfinning að skora í varaliðsleiknum á dögunum.

„Það var frábært að finna aftur tilfinninguna þegar maður er að spila, og að skora líka þó fyrra markið hafi bara verið eitthvað pot. Það er æðislegt fyrir mig að vera kominn aftur á völlinn. Ég þarf leikform og líkaminn að venjast því aftur að spila fótbolta en ég tel mig vera á góðum stað."

Hann fékk lítilsháttar nárameiðsli í varaliðsleiknum með Nantes og ólíkelgt að hann spili vináttuleikinn gegn Mexíkó á föstudagskvöld.

„Ég þarf að hvíla í nokkra daga en vonandi get ég náð þeim leik. Annars er ég ekki að setja pressu á mig að spila þann leik. Vonandi næ ég einhverjum mínútum gegn Perú (næsta þriðjudagskvöld) en við verðum bara að sjá hvernig það verður," segir Kolbeinn Sigþórsson.