KA gerði jafntefli gegn HK á Akureyri í svakalegum leik. KA var marki undir og manni fleiri í hálfleik, tókst að komast yfir en HK jafnaði metin í uppbótatíma. Fótbolti.net ræddi við Hallgrím Jónaasson, þjálfara KA, eftir leikinn.
Lestu um leikinn: KA 3 - 3 HK
„Maður er nátturulega svekktur eftir að hafa verið yfir þegar þeir skora úr aukaspyrnu, fá frían skalla. Ég held að þetta hafi verið sanngjarnt, við fengum færi sem við hefðum átt að skora úr og Stubbur varði líka tvisvar eða þrisvar frábærlega," sagði Haddi.
„Ég er ánægður með fyrstu 20 mínúturnar í fyrri hálfleik en hinar voru hræðilegar. Það var betri frammistaða í seinni hálfleik, skorum tvö mörk og hefðum átt að halda áfram og klára leikinn."
Haddi var ósáttur með varnarleik liðsins.
„Eftir góða byrjun fannst mér við slaka á varnarlega, það er það sem ég er ósáttur með. Um leið og þú gerir það þá er þetta ekki gaman, þú verður bara lélegur og færð á þig færi og mörk og farinn að hlaupa endalaust á eftir mönnum. Mér fannst við ekki nógu duglegir síðustu 25 mínúturnar í fyrri hálfleik."
KA hefur að litlu að keppa það sem eftir er móts þar sem liðið siglir lygnan sjó.
„Markmiðið er að gera eins vel og við getum. Við vorum hérna í fyrra og unnum fjóra af fimm, því miður unnum við ekki í dag þá þurfum við að vinna hina fjóra. Það voru fullt af strákum sem fengu að spila í dag sem hafa fengið að spila minna. Ég sá að þeir komu inn með gott hugarfar og þess vegna var seinni hálfleikurinn mun betri en fyrri," sagði Haddi.
„Við höfum að mörgu að keppa. Við viljum ná sjöunda sætinu og njóta þess að spila fótbolta með félögunum og gera vel án þess að vera undir mikilli pressu því næstu leikir eru ekkert sérstaklega skemmtilegir, æfingaleikir og Kjarnafæðimót.
